Dii AT, Soccom KB

KOTA BELUD – I Fr Maxmillianno Hontor minomuruan do Misa tadau ko-onom tagayo (sodop Paskah) id panambayangan St Cecelia, Piasau, Zon Pekan, Paroki St Edmund Kota Belud.

Id wokon ii ka’ajaran di sio magangat di toinsanan di nakarapou id Misa dii, “Sodop di baino mamaramai tokou do kinamanangan di Kristus, kinotungaggan Dau mantad kapatayon om iti o kosiwatan tokou do mimpuun do koposion wagu muli tokou miampai ginawo do wagu, ginawo i lobi otumbayan om ginawo di lobi lumansan kopio Dau om lumisiu Dau.” Magangat nogi i sio do monokodung miampai sambayang kumaa di wagu nangabaptis do moi daa kaanu yolo do kagarasan jumadi do saksi diti kinotungagan di Kristus do nombo nopo yolo do mogigion.

Naamot dilo i Fr Isidore minomuruan do Misa sodop Paskah id Paroki St Edmund miampai minambaptis soginumu 35 tulun.

Ka’awi po i Misa om binarakatan di Fr Maxmillianno i lilin paskah pogulu i nigitan di katekis ngawi montok ‘stasiluar’. Binarakatan nogi di Fr Maxmillianno i tontolu manuk pogulu i pinotikid kumaa dii nakatanud diti Misa.

Dii AT, Soccom KB

TIMBANG, Kota Belud- Rinamai do tulun Kristian Katolik id pototongkop do pomogunan o tadau ko Limo Tagayo miampai tumanud sambayang Ralan Salib, mogisusuai o kinoiyonon do pinopoharo diti om amu nogi oiduanan o Paroki Kota Belud.

Okito id gambar, maso minomuruan i Fr Maxmillianno Hontor sambayang diti id Bukit Kudus Zon Timbang iso mantad di apat o kinoiyonon di pinapaharo do sambayang diti id suang paroki St Edmund Kota Belud.

Lobi hatus tulun ii minoi tanud miampai tanganak di ongokoro poh. Id sosodopon nopo nga minogidadamot o panambayangan ngawi pinapaharo do sambayang kapamantangan salib.

Dii AT, Soccom KB

KOTA BELUD – Lobi 30 Katekis Paroki St Edmund, Kota Belud i binuruanan di Katekis Blasius Kusi, Ponorikohon, minonginwagu do komitmen diolo sabaagi katekis momuruan sambayang tadau minggu ontok aiso pado, manahak kosombutan (komuni kudus) om momuruan sambayang toi pamarakatan do suai id labus do gereja, di ontok ko 22 Mac 2026.

Id Misa tadau minggu ko limo prapaskah, binuruanan di Fr Isidore Gilbert ontok kosuabon dilo om wookon id ka’ajaran di sio nopo nga pinoposorou di katekis ngawi do tootopot dot mongigit do karaja toi ponompuanan diolo sabaagi do katekis.

“Kada dikoyu owito nunu nopo o kobolingkangan mantad walai, kinoiyonon posorili, toi mantad binuruon dokoyu, suai ko i Yesus o owiton dokoyu kumaa do tulun di ongotumbayaan hinongo kou nopo do monompuan.

“Nung monompuan kou do amu dokoyu owiton i Yesus nga, nunu nopo i wonsoyon toi boroson dokoyu dii nga yokoyu no o mimboros id di, om okon ko i Yesus. Mantad dilo do id koinwoguan do komitmen om kopougadan dokoyu do mongoi ponompuan, mositi do haro koinsiribaon ginawo om kapanahak pomitanan tosonong kumaa tulun di tompuanon dikoyu,” kaa di paado.

Pogulu i dilo pinopoharo po do rekoleksi o tinimungan diti katekis ontok 14 Mac 2026 miampai di Fr Isidore om Fr Maxmillianno montok koposodian ngawi diti kina’antakan di baino.

Dii EVA/AT, Soccom KB

KOTA BELUD – Nakaanjur o iso kursus pemberkatan toi konvalidasi pisasawaan ontok 7 Mac 2026 om pinaanjur iti miampai piniuhupan do Komiti Katekis Paroki om Komiti Kerasulan Keluarga Katolik Paroki (KKKP) soginumu 22 misasawo nakatanud.

Hontolon nopo do kinopo’onjuran diti nga manahak pomorotian taralom kumaa dii misasawo do nunu kopio o rati pisasawaan tumanud ka’ajaran do gereja toi ko Kristian, om nogi manahak koposodian diolo do monorimo pamarakatan toi konvalidasi pisasawaan id suang do gereja.

Wookon di pinonuang sesi ngawi di pinolombus nga kokomoi do sakramen pisasawaan, suai ko ilo pinosotol nogi o topik ekonomi id suang do paganakan tumanud do kaajaran Alkitab om poingkuro mongurus dot kousinan dit abaal.

Kursus nogi diti nga noroitan o poingkuro mongulud dot paganakan Kristian id koposion tonggungan ngoduo molohing do monuridong paganakan i kikotumbayaan om nogi piromutan pisasawaan di oulud.

Toinsanan dit nakatanud noonuan timpu do minsingilo nunu i nawayaan diolo id poingompus do kursus. Ababayan sangadau diti nimpupuson miampai kinopotunuian do sijil montok tanda pamagatangan di toinsanan nakatanud diti kursus.

Poingompus do kursus diti nakapanau do osonong tu’ haro piuhupan tosonong mantad manganganjur om i tuminanud.

Dii Christina Omok

TERAWI – Nakaanjul o bobooson nokomoi di kavavagu id Paroki Holy Nativity Terawi ii kituduvan do pamanaan di obitua maza do kobontugan di poinhosok. Bobooson koiso nopo nga pinohombus di Fr Thomas Yip ii kobituhan id timpu do koponogitan. Ginovoo no ii gagut diozu id timpu do koponogitan diti ka disido.

“Potitikid di kobituahan mositi do kivaa do pambasaan do abal tavasi mooi do koposizon dotokou tomoimo do opulokis miampai do piumonon doid suang panambazangan oh tohu persona mooi do kivaa do pionitan do panambazangan, komuniti om paganakan om mipahud do mamanau doid kobituahan.

Sambayang nopo nga pinuobo do koposizon tobitua id timpu do koponogiatan diti iso pionitan di tososonguhun ii kumaa doid kobituahan om piisaan miampai di Spiritu Tobitua om iti pointantu nodo maza di Jesus Kristus.

Koponogitan nopo nga okonko komozon mamazada timpu di opusou nga iti nopo nga iso pamanaan di kobituahan di aahom kozo sohinaid do 40 tadau iso retreat montok do koduduvo montok do koposodiaan tuhun di kikotumbazaan montok do kalamazan di tagazo doid kalendar do Katolik ontok Paska ii Kinotungagan di Ttuhan ii tuminimpuun miampai pamanaan id timpu koponogitan.

Toput luputan id suang Catholic Sabah Vol 69 No 7 di ontok tadau 5 Apr 2026.

Dii AT soccom KB

KOTA BELUD – Pembaptisan do tanganak siriba turu (7) toun nokoindalan id Paroki St Edmund, Kota Belud ontok 11 Jan 2026, siginumu 23 tanganak di nokohompit.

Ababayan diti nopo nga siri koiso do toun 2026 om iti nopo nga pinaanjur di Komiti Katekatikal. Upacara Sakramen kopodsuan nopo diti nga binuruan di Fr Maxmillianno Hontor om nuhupan di piipiro katekis om puru katekatikal paroki.

Pogulu i dilo pinapaharo po ii komiti do rekoleksi montok koposodiaan molohing om penanggung. Nimpuunan o rekoleksi diti do Misa Tobitua i binuruan di Fr Isidore om potilombuso o sesi koiso om sesi koduo mantad di Fr Maxmillianno.

Wookon di pinosotol kopio id goduduo sesi toi boboroson dii nga kokomoi do tanggungan koiso di molohing montok monimpuun toi monimbaru kotumbayaan di tanganak om paparati kopio do iti nopo sakramen kopodsuan nga to’ongobon (pintu) sumuang di sakramen ii suai id suang do Gereja Katolik.

Id poingompus di rekoleksi koposodiaan diti, toinsanai di molohing om pananggung nga pinopokito komitmen di tosonong om minanahak yolo do kerjasama ii poinponu.

I tobpinai Mathilda Jun (sabaagi ponorikohon Komiti Katekatikal Paroki) linumansan do maya sakramen kopodsuan diti, ahakon daa di molohing ii tangaanak ngawi kumaa kotumbayaan otorodok om mingiat masi id suang do Gereja.

Dii AT soccom KB

KOTA BELUD – Id gambar okito i Fr Isidore Gilbert om i Fr Maxmillianno Hontor minokigambar miampai ponorikohon ngawi ii haro id Paroki St Edmund Kota Belud.

Iti nopo nga nokoindalan ontok 9 Jan 2026 om iti nogi pitimburungakan kumoinsan di Fr Gilbert soira nokoundaliu isio monompuan hiti id paroki.

Id boboroson toniba di paado id kotimpuunan, oondos om ounsikou ginawo di sio do monompuan dot tulun ongotumbayaan do hiti, om noboros nogi di sio do, “…paroki diti okon ko wagu montok doho tu ontok di wagu oku po katabis do paado (2009) nga nokoumbal oku monompuan toruhai do hiti om kakal po haro o otutunan ku wokon di poinpuru do pipiro komiti diti…” ka di paado.

Nokoboros nogi isio do popotilombus di nunu ii napalan mantad di paado nokopogulu om mokianu nogi sokodung i paado kumaa toinsanai puru ngawi om nogi mantad tulun ongotumbayaan id paroki diti om id stasiluar id siribo paroki Kota Belud ka di sio.

Dii AT Soccom KB

Id gambar okito i Fr Isidore Gilbert minokigambar id toguang walai paado miampai pipiro tulun di minongoi tanud pinapa’atod dau hiti paroki St Edmund Kota Belud dit ontok 5 Dis 25. Tinumanud ginumambar nogi i Fr Maxmillianno, i Sister Maybelle  om i Sister Clarice.

Id boboroson toniba di Fr Isidore, suminimbar dit boros koromitan mantad di tompinai Jerrel Soo (ponorikohon MPP), minoboros i Fr Isidore do popotilombus di nunu nopo wowonsoion di Fr Jalius kokomoi di koburuon tulun ongotumbayaan do hiti id paroki toi id labus paroki (stasiluar/chapel).

Mokianu nogi i sio do sokodung toinsanai di tinimungan moi do osonong kapapanahon di nunu nopo ababayan di po’onjuron kaa di Fr Isidore, id maso do makan tangaadau naamot minogiintutun i tinimungan pinapaatod di Fr Isidore om i tinimungan di minamaramit di paado id paroki St Edmund, Kota Belud.

PINATOD do Paroki St Peter Claver Ranau o Salip MPC do hiti id Paroki St Edmund Kota Belud di 5 Dec 2025. Kinoruhang do pipiro tulun ongotumbayaan mantad paroki dilo i Fr Ambrose Atang om i Fr Willson, nokorikot o salib dilo id paroki diti om rinamit di Faado Paroki Fr Jalius J Sading om i Fr Maxmillianno Hontor miampai piipiro tulun ongotutumbayaan do hiti.

Noowit sinumuang o salib dilo kumaa id toguang do Altar (panambayangan St Edmund) om pinotimpuun o Misa Tobitua ii binuruanan di Fr Jalius.

Id kaajaran, ii pinopolombus di Fr Maxmillianno wokon do noboros disio kokomoi dilo Salib MPC koiso nopo nga “mamasi om mongigit di sunduan lisiu di Jesus kumaa paganakan id kinoionon pakarajaan om id tinimungan posorili kinoionon tokou, koduo “mongingwagu do kotumbayaan tokou om popogirot sunduan di tulun di oimuri do sumakit,” popiiso do tulun ongotutumbayaan id nayatan do KKD, KPUK om id paroki ka di Fr Maxmillianno.

Id boboroson soira nopupusan ii Misa Tobitua, i Fr Jalius minomoros do osonong kinorikatan kumaa goduo paado om kinoruhangan mantad Paroki Ranau om ounsikou ii paado tu nokorikot o salib diti miampai aiso nununu kaantakan di au osonong, om baino tonggungan no dahai iti soira do notorimo dahai gisom do kaatod dahai hilo id Paroki Kudat, ka di Fr Jalius.

Toput luputan id suang Catholic Sabah Vol 69 No 1 di ontok tadau 4 Jan 2026.

Dii AT Soccom

KOTA BELUD – Nakaanjur o Tadau Paganakan Komiti Katekis id paroki diti di ontok ko 20 Oct 2025 om rinamai o tadau dilo id iso tampat podtuongisan, Kg Purak Ogis Kota Belud.

Id koromitan do tadau dilo, ogumu abaabayan do noulud, nga iri nopo id limunduk no kopio nga karamaian Misa Tobitua ii binuruanan di Faado Paroki, Fr Jalius J Sading. Wokon dii kaajaran dau ontok Misa dii, ounsikou kopio ginawo dau tu nosiliu toi ko nokohuboyo no di baino iti tadau piandad-andad do katekis ngaawi (tadau paganakan katekis).

“Alaid no da powonsoion iti nga kopiluntan-luntan nopo tu haro o kaantakan do suai. Om otumbayaan oku do iti no tadau di tinahak do Kinorohingan montok do katekis ngaawi,” ka di Fr Jalius.

Magangat nogi ii faado do katekis ngaawi do onuan daa o timpu diti do rumamai, mogiintutun do paganakan katekis ngaawi di nokotindapou.

Id booborosn di faado ontok kolimpupuson d i Misa Tobitua , manangkabayahan isio kumaa di AJK ngaawi di pinoposodia di abaabayan ontok diri, ii binuruan di Kat Jetry Abel om alansan ii faado do au daa momirubat do timpu diti do rumamai, haro nogi o kolunguian di faado tu haro o piipiro do katekis di au nakaampai sasabap no do kaantakan diolo do suai ii amu milo do ilihan nga alansan ii faado do kaanu yolo mamung miagal diti id timpu do suai.

Toput luputan id suang Catholic Sabah Vol 68 No 22 di ontok tadau 16 Nov 2025.