Fr Sunny Chung miampai di kototoimo do Sakramen Kopodsuan

By Paul Bestan

July 7 2022

INOBONG – Ontok nopo do maganu tokou do hang do tumanud di Tuhan Jesus, nga’ kada’ tokou nodii daa pokovihi’ do mintong id douvi’ dotokou nga’ mintong daa id poguhu miampai poimponu do kahansanan om kotumbazaan doid di Tuhan Jesus, ka di Fr Sunny Chung.

Noboos di Fr Sunny iti maza kopongia’an poimbida’ disido di ontok pinopotoimo do Sakramen do Kopodsuan om Kosombutan Koinsan id kalamazan Misa Tobitua tunonob tadau do doiho’ id Panampazangan Sacred Heart do doiti di 25 Jun 2022.

Minoboos isido do “nung kumovihi’ tokou nopo nga’ au’ tokou dati’ kaanu do mamazada’ toi ko’ monongkizad di koposizon haid dotokou,” ka disido.

“Iho’ no poogi do apatut do pahansanon tokou o saviavi’ id hongon do Kinoingan om otumbazaan doid Disido tu’ ii-Isido no i kaanu do poposimban do koposizon haid dotokou do kumaa doid koposizon kavavagu”.

Tumanud di Fr Sunny, isido po’ noogi’ i pinahansanan naamot di Archbishop John Wong, i huguan diosis tagazo do Kota Kinabalu, do migit om papapanau do kalaja’ ngaavi’ poimbida’ do eklizia id uvang eklizia do Holy Trinity Inobong do maamantad po’ di pinopotigog do minidu pogun i rector haid do uvang eklizia nokomoi, i tongotiagak Fr Alexander Sipanul vi vuhan Ka-apat toun di baino, do sahagi’ do au’ tokou monongkizad di koposizon haid dotokou, au’ i tokou kaanu do tumanud miampai do humansan om otumbazaan doid di Tuhan Jesus”.

Suvai ko’ iho’, minongudizo’ nogi i Fr Sunny do saviavi’ tuhun ongotutumbazaan i nokotindapou id kalamazan Misa Tobitua dii kokomoi do nunu kozo i kapangagos om kapagantob dioho’ do tumanud om otumbazaan doid di Tuhan Jesus.

Sabap no diho’ ka’ disido do pinoposoto’ do avasi’ do ihoon dotokou i nontodonon dii do mooi do au’ tokou nodii apagangan do tumanud di Tuhan Jesus.

Naamot id kalamazan Misa Tobitua dii, kiginumu do 42 tuhun do nokotoimo do Sakramen Kosombutan Koinsan  nogi’ mantad Sacred Heart Inobong, duvo tuhun mantad Panambazangan Katolik Madsiang om songuhun mantad St Thomas Togudon. Suvai ko’ iho om soginumu do 10 tuhun mantad Panambazangan do Sacred Heart Inobong do nokotoimo do Sakramen do Kopodsuan.

Saviavi’ panambazangan nopo’ diho’ nga’ id siibo’ do kopomuu’anan do uvang eklizia do Holy Trinity Inobong.

Ahansan i’ Fr Sunny do kogiot no daa o kotumbazaan do tanak ngaavi’ i minonoimo do Sakramen Kopodsuan om Kosombutan Koinsan maza do kopodulianan om tonggungan do mohoing ngaavi’ dioho’ miampai popoobi’ do timpu dioho’ do mongia’ do tanak ngaavi dioho’ kokomoi do eklizia om kopongia’an dosido.

Minongunsub nogi isido do mohoing ngaavi’ do kada’ daa kozo hansan di mongingia’ ngaavi’ do Sikul Minggu do mongia’ do tanak ngaavi’ dioho’ tu’ totopot nopo ka di Fr Sunny nga’ mohoing no i mongingia’ koiso’ do tanak ngaavi’ dioho’.

Pinoposoou nogi isido dioho’ do tanak nopo ngaavi’ nga’ tountud do eklizia do timpu diti om timpu dumonto’.

Iho’ nodii poogi, ka di Fr Sunny do minoboos, do kada’ no daa mai zomutai i koposizon kavavagu i notoimo di tanak ngaavi’ maza do Sakramen do Kopodsuan nga’ gompizon no daa ii do tavaavasi’ do mooi do ohidang om abaakas tomoimo om kosudong id dumbangan do mato do Kinoingan.

Tinaandak nogi o pizunguan montok di saviavi’ i nongokotoimo do  sakramen dii do doiho’ id hintuun toiva’ do Panambazangan Sacred Heart Inobong, sabaagi do ponoko-au-giigina’ om kounsikaan di kopongo’ i Misa Tobitua  dii miampai do notindapou do mohoing ngaavi’ om manananggung ngaavi’ di minonoimo do sakramen kaampai no i Fr Jack Johimi.