Dii AT Soccom KB
KOTA BELUD – Pinapaanjur o Paroki St Edmund do iso seminar kokomoi do Liturgi id dewan paroki ontok di 26 Julai 2025. Iti nopo nga pinaanjur do Komiti Liturgi Paroki, om soginumu do 468 tulun ngaawi ongotutumbayaan do minampayat do seminar dilo ii kogumuan diyolo diti mantad panambayangan labus toi stasiluar id suang do Paroki St Edmund Kota Belud.
Notimpunan o seminar diti do sinding-sinding mamarayou di Tuhan ii binuruanan do puru/komiti CCR om pinotilombus do ‘Pentakhtaan Alkitab’ ii binuruanan di Faado Paroki, Fr Jalius J Sading.
Wookon dii kaajaran di pinolombus di Fr Jalius tumanud di bacaan Injil ontok diri “Magangat i Fr Jalius do tumoboi kopio o kotumbayaan kumaa di Tuhan om momonsoi di tongosonong mulong pia do poimpasi tokou id pialatan di tulun tangaraat nga onuan tokou di Tuhan do kagarasan,” ka di faado.
“Om kumaa dii nokorikot mooi tanud diti seminar alansan oku dikoyu do onuon kopio o timpu diti do totopot mokinongou om mongiralom kopio do toilaan kokomoi kapapanaho diti Lirutgi,” ka dau.
Pinotilombus o seminar diti miampai ababayan koiso kokomoi do ‘Rati do Misa Tobitua’ ii pinolombus di Sr Maybelle. Sinusuhut ilo do boros-boroson kokomoi do “Kapapanaho di Misa Tobitua’, ii pinolombus di Fr Jalius.
Kalapas po o makan tangadau om pinotilombus kaagu do boros-boroson kokomoi dot ‘Sakramen Tobitua’ ii pinolombus di Cikgu Suelen. ‘Rati do Kalender Gereja Katolik’ nopo nga pinolombus di Fr Maxmillianno B Hontor.
Iso kaagu kokomoi do ‘Tanda-tanda ngaawi do Sakramental id suang do panambayangan ii pinolombus di Sr Clarice, om tohuri nopo nodi do boros-boroson nga pinolombus di Fr Maxmillianno kokomoi do “Pisuaian do sambayang Misa Tobitua om Ibadat Sabda”.
Toinsanai ngaawi di boros-boroson dii nga haro ngaawi o timpu miuhot om misimbar (soal jawab) miampai dii paado om tulun ongotutumbayaan ngaawi id seminar dii.
