Dii AT Soccom KB
KOTA BELUD – Rinamai dot tulun ongotumbayaan panambayangan St Alphonsus Ligouri, Kg Ulu Kukut Kota Belud, ot tadau miontong dit ontok ko 1 Ogos 2025. Pinotimpuun ot karamaian dilo miampai misa monikid tadau di jam ko 6.30 sosodopon it binuruanan di Fr Jalius Sading.
Id kaajaran di sio, magangat e paado dot tumorodok kopio dot momonsoi dit ponuhuan dot Kinorohingan dot miampai aawi-awi ot ginawo. Kada tokou lansan dot kaanu tokou pamagatangan dot nunu e nowonsoi tokou dot hinombo tokou nopo dot mogigion om potoboyon nopo o ginawo tokou miagal di Santo Alphonsus (santo miontong dot chapel diti) e ramaion tokou tadau biano om kaanu tokou no daa dot sunduan mantad dau.
Id boboroson di paado, soira nopupuson e Misa, agayo kounsikahan dau dot haro kinoburuon om kinosimbanon dot panambayangan diti okon nopo ko iti walai nga iti nogi susumambayang dot hiti ka di sio. Otumbayan nogi e paado iti mantad no dot pisokodungan dot mogigion dot hiti om lolobi no e katekis dit monompuan.
Pogulu e dilo mantad di Katekis William Musda om e Rosedyline Mansor (ponorikohon Chapel) monongkotoluod kumaa di Fr Jalius tu nakaanu kosiwatan dot rinumikot minampai diti karamaian om lolobi no di Misa Tobitua, kumaa toinsanai katekis mantad Zon Timbang om isai nopo e nokorikot om amu olingan e Sr Maybelle.
Pinotilombus ot karamaian diri miampai minomutul dot kek, ginumambar miampai di paado om minogiilung dot makan, haro nogi ot pinomurutan dot ngaran kinasip om kopokitanan koir mantad tanganak (PMG). Chapel St Alphonsus nopo diti nga di piitangaan watas Kota Belud om Kota Marudu om id siriba do Zon Timbang paroki Kota Belud.
