PIBABASAN doid savi’avi’ tutumanud di Kristus. Kogumuan dotokou do ogumu’ o iumon id diti koposizon, om au’ aavi’ o ii-iumon do vookon dotokou. Nga’ kivaa tuhun di kopiuman do aiso nodii ii-iumon dioho’ tu’ nogonop no izioho’ do onu nopo kotos diti Pomogunan. Ii aiso akanon, mogium do takanon. Ii maso tutuuvan, mogium do inumon. Ii aiso kalaja’, mogium do kalaja’.
Ii aiso usin, mogium do usin. I ogumu’ usin, nung agazo no angkab, mogium po vagu’ do lahan monginggumu’ dii usin dioho’ om ogumu’ po ii-iumon suvai. Atangkangau nopo nodii ; om ii oindamaan do atangkangau nopo nga’ kohiiu di Jesus Kristus.
Soovon tokou i Jesus Kristus
Om kogumuan tuhun do kopiuman do au’ nopo nogonop. Aiso po hamin tagazo, aiso po sasakazon toi’ au’ po nokoimau’ momohi dii sasakazon hobi do agazo, au’ po ogumu’ halata’ toi’ au’ po nakagazo o gaa’. Atangkangau nodii do mogium diho’ ii-iumon ngaavi’ dioho’.
Kopiuman nopo do au’ poinggonop. Ohiivan nodii do monongkotohuod di Minamangun ; do kakaal muupuobo om kivaa ponokop do tinan, kivaa susuton, hunanon, tibungon om kaakan nopo, sundung potuu do okuudi’.
Sundung do atangkangau tokou do mogium do onu noopo i hizabon, kada’ tokou hiivai i Tuhan dotokou, Jesus Kristus. Nung ohiivan dotokou Isido, nga’ obohingkaang tokou mai’.
Kaahau tokou
I Thomas, ii nokoboos do, “Oi Tuhan, au’ i’ izikoi koiho doid nombo pakaazan nu, dadi’, ingkuo zikoi dii do koiho dii lahan?” (John 14:5) Tuhun toomod ngaavi’ tokou, saasau’ tokou do kaahau. Kaahau tokou do songian mogium dii ii-iumon dotokou. Dadi’, oihaan nopo di tangalaat ii hiihizabon dotokou, kaanu izioho’ do papalavong toi’ ko’ papaahau dotokou.
Ogumu’ poomitanan do ingkuo do kaanu i tangalaat do mimang diti. Kivaa tuhun mokipuupuavang tu’ au’ po nogonop hinaab di taap dii susuton dioho’ ; au’ nogonop o ginazo di sasakazon ; au’ po nakagazo o gaa’; au’ po akapa ii toodopon, ii titibungon ; au’ po kouzog diti Pomogunan i tuni di pouniinizon dioho’ ; toi’ au’ po nokoingkavas kozo o sinikulan dioho’.
Kivaa nogi’ gumaab do oguugumu’ po o kotos om opuupuavang po. Kivaa nogi’ di au’ po nasantaban tu au’ po nakaahib dovokon doid ningkokoton dioho’. Ingkuo izioho’ dumimpot diti atag ngaavi’?
Lahan kalaatan
Abaa mai’ ii tangalaat do papaahau toi’ papalavong dotokou, nung au’ tokou no poindoos di Jesus Kristus. Kivaa mai’ tuhun do gisom i’ do momoduso, manakau om monipu’ toi’ ko’ ki-koimaan kadaandang do kootulan songian do dumaapas do lahan talaat kozo sabap minsodu’ mantad dii lahan di Jesus Kristus.
Poomitanan, kivaa dii gisom i’ do manaak do suap, do paganu dii pong-ki-oo-onuan. Kivaa dati’ dii gisom i’ do kopogium lahan do magaau do savo toi’ sinavaan do tuhun. Lahan momoguno dii tangalaat. Kivaa vagu’ di tabaa do monipu’ momoguno do internet do mimpuavang.
Mooi do kagazo i tiizonon, hobi ginumu’, ginazo dii sasakazon, om ii dii pouniinizon nga’ mutub-kutub. Songkookoko do mongiak om i tangalaat nga’ hobi do mingkoko mongiak tu’ ouangan dii gia i layat dioho’ id Nalaka’.
Mokituduk di Jesus Kristus
Au’ kotunud o lahan diti. Nakaahau izioho’. Kopomidouso po haid do toniinini’ om gumazo nodii gisom i’ dati’ do au’ nodii kosudong do oviton di Jesus Kristus kumaa’ id Surga. Osoosomok izioho’ di tangalaat.
Nung adampot po dioho’ ii tuduvan, kivaa mai’ vagu’ lahan hobi linaat do potudukon di tangalaat mooi do hobi koinsodu’ mantad lahan di Kinoingan. Iti lahan talaat no o kopogovit do tuhun doid kopomidousaan hobi ginazo. Onu tinimpuunon? Sabap au’ minogium di Tuhan Jesus.
Apatut iti tuhun Kristian do mogium di Jesus Kristus poguhu i’ do tumimpuun do mogium di ii-iumon dioho’. Sumambayang po do mokituduk di Jesus Kristus di lahan kotunud. Kivaa i’ mai’ lahan di Jesus Kristus do mononsunud om monontuduk dotokou nung avasi’ i ii-iumon dotokou. Nung au’ avasi’ ii, koivad tokou mai’, mantad dii, do tosiisikap..
Nung pointanud tokou tomoimo di Jesus Kristus, koiho tokou do nunu ii koimaan kotunud om nunu ii au’. Nga’ nung osodu’ nopo tokou mantad Disido, hobi mai’ do aanangan tokou do mimang do koimaan tangalaat.
Dadi’, oi tobpinai ngaavi’ ku id Kristus, mositi’ no do potunudon dotokou o lahan do koposizon. Iumon dotokou tomoimo i Jesus Kristus do mokituduk Disido dii lahan id katapatan om kotunud id koposizon.
Id buuk di John 14:6 : Poboos no i Jesus do, “Izou no i lahan; i Katapatan om Koposizon. Aiso i’ do koongoi doid di Tama’ nung okon no ko’ maza’ dogo’”. Amen. Kotohuadan do minambasa’.
