Dii AT Soccom KB
TIMBANG – Tinaandak om rinamai o tadau Kaamatan nayatan Zon Timbang di 28 June 2025 id panambayangan St Hilary Paroki St Edmund Kota Belud. Pinotimpuun ilo miampai Misa Tobitua ii binuruanan di Fr Jalius J Sading.
Id ka’ajaran di Fr Jalius, minoboros isio do karamaian Kaamatan nopo nga okon ko ramaion tokou dot maan to’omod, katapi agayo rati diti montok dati tulun KDM. Noonuan tokou dot Kinorohingan diti tana tosingawa om oluhub id pomogunan diti dot pomutanaman tokou om nointutunan tokou nogi dot tulun dit tongopori tu mantad po kumoakian tokou morobuat om momutanom yolo momoguno dot longon (okon ko miagal do baino tu mesin no ngawi o gunoon).
”Id karamaian Kaamtan nogi nga iso ralan tokou do popokito dit koubasanan dit tinunkusan tokou miagal taakanon, basaan om lolobi no boros sandad tinaru tokou, iri no poogi dot langadon om orohian oku dot momuruan sambayang/misa diti id boros dot dusun, om orohian oku nogi dot haro nopo ii komulakan sukod wagu dit koilo mimboros do dusun nga barasan oku no om pogiboboros kou no” ka di Fr Jalius.
”Karamaian diti nogi nga iso ralan tokou dot monongkotoluod kumaa minamangun mantad dot nunu ii no’omot tokou mantad hasil karaja tokou,” ka dau.
Magangat nogi i Fr Jalius do munsikou om mamarayou Kinorohingan tu minanahak kosiwatan diti karamaian om sorohon tokou no dot nunu nopo ii naanu-anu tokou nga mantad ngawi id Kinorohingan om rumamai tokou miampai ginawo dit osonong.
Ii ponirikohon MPP tobpinai Jerrel Soo, nokorikot nogi id karamaian diti noonuan kosiwatan dot manahak boboroson om wookon nopo dot pinoboros disio nga ilo tulu toi tema diti Kaamatan “mitanud mamanau id kalansanan manampasi koubasanan saabagi iso paganakan tumanud kaajaran do Gereja”.
Minoboros i Jerrel dot kosudong no o tulu diti dot posotolon tokou kumaa dit sukod wagu moi dot kaanu no daa yolo mamagatang dot nunu ii pinotungkus mantad kumo’okian. Iso nopo nga ilo mamantang kumaa tiso om tiso lolobi no ii tanganak kumaa molohing dau.
Ii Dominic Sintar Laus, saabagi dot ponirikohon karamaian Kaamatan nayatan zon diti, monongkotoluod au ogigina kuma di Fr Jalius, minomuruan dot Misa Tobitua om pinopoimagon dot karamaian diti. Hontolon nopo dot karamaian diti nga popotilombus dit koubasanan tokou om tanda koponongkotoluadan tokou dit sunduan/bambarayon dot parai.
Monongkotoluod nogi i Dominic kumaa toinsanan dit nokohompit dot kopongonjuran diti om nogi ii minanahak do toluod tusin toi nunu nopo ii pinonokodung diolo montok karamaian diti, om agayo pokiompunan dau sokiro dot haro o au kosontob do ginawo id poingompus karamaian diti.
Pinotilombus o karamaian dii id Dewan Komuniti Timbang om haro piipiro ababayan dit noulud. Pogulu dilo i Fr Jalius om kinoruhangan minongomot dot parai om minonuntung di tagung do inturu sabaagi ponokotanda do nokoimagon o karamaian Kaamatan id zon diti. Wookon di minongoruhang di Fr Jalius id saasawat nopo nga AJK Penganjur, MPP om Sr Marybell fsic. Minomuruan nogi i Fr Jalius di pialaan nansakan koubasanan. Ababayan do suai nopo nga pialaan basaan tanganak, pialaan sugandoi om drama tari, amu nogi olingan ot tiket kinasip pamaramai do tadau dilo. Nopupusan o ababayan ontok dilo miampai sambayang binuruanan di Kat John Simpul.
