Di AT Soccom
TOBURON, Kota Belud – “Isai nopo ii momonsoi dit ponuhuan do Kinorohingan nga yolo no ii tobpinai ku tondu om kusai, om yau no ii molohing ku tondu ka di Jesus” id pambasaan Injil ontok ko 28 Jan 2025. Nokopihondot di Misa monikid tadau om kinotombuluian di Fr Maxmillianno id Panambayangan St Benedict Kg Toburon id suang Paroki Kota Belud. Wookon do kaajaran di faado ontok Misa dilo, magangat nogi isio do minggisom kopio do tumanud do nunu ii ponuhuan do Kinorohingan.
“Osiliu tokou no do tobpinai di Jesus miagal di boros Injil di baino, om mingisom tokou nogi do moningolig diti kotumbayaan tokou miagal di santo-santo ngawi ii nakasanggup yolo minatai sabap no do kotumbayaan togirot kumaa di Jesus,” ka dii Fr Maxmillianno.
“Mulong piad alambat o faado do korikot do mooi tombului hiti id kampung diti tu saasabap no do ogumu tompuanon id panambayangan do suai om karaja ngawi di noulud id Paroki St Edmund, nga pinggisom kou no do tumanud di ponuhuan do Kinorohingan id koposion do monikid tadau.
Id Panambayangan St Benedict Toburon nopo nga kisinodu 45km mantad Paroki St Edmund. Otombului do faado do insan sombulan, sambayang monikid minggu nopo nga tompuanon do katekis.
Kopongo ii Misa ontok tadau kinotombuluian di faado dii, minamarakat i faado do piipiro kakamot tolidang (barangan kudus) ii gunoon do tulun ongotutumbayaan do sumambayang. Iti sinusuhut do minokigambar miampai di Fr Maxmillianno do montok no do kahandaman diti kinotumbuluion. Pinapaharo dii do pinogiilangan do makan di pinosodia di tinimungan koonduan ngaawi.
