Dii AT Soccom KB
KOTA BELUD – Rinamit dot tulun ongotumbayaan paroki St Edmund, Kota Belud ot kinoulitan kinosilihan paado ie Fr Jalius J Sading ko-24 toun om ie Fr Maxmillianno B Hontor ko-11 toun dit ontok 29 Jun 2025.
Id boboroson di Fr Jalius do agayo kounsikahan dau kumaa minamangun tu nonuan yau kolidasan om barakat tosima id saralom dot ponompuruanan dau solinaid dot 24 toun sabaagi dot paado. Monongkotoluod nogi yau kumaa di minongulud do pinapaharo dot koromitan diti om yolo dit nokorikot mantad chapel dit osodu toi osomok dot minongoi ampai om monokodung.
Alansan nogi e sio dot toririmo haro sokodung sambayang mantad umat kumaa paado ngawi, mokiampun nogi e sio kumaa dit tososongulun dit au orikatan monumboyo kokomoi dot koponompuruanan dau dot hiti.
E Fr Maxmillianno nogi nga monongkotoluod kumaa dit nokorikot ontok sodop dii om alansan e sio dot otilombus ot piisaan dit om sokodung sambayang toririmo kumaa diyolo. Pogulu e dilo boboroson mantad di ponorikohon Majlis Pastoral Paroki (MPP), tobpinai Jerrel Soo monongkobayahan yau kumaa ngoduo paado dit minamaramit dot kinoulitan kinosilihan paado om magangat dot tulun ongotumbayaan do hiti dot toririmo manahak sokodung kumaa di paado om lolobi no sokodung sambayang moi dot olidas om kiharo kasari kagarasan id koponompuruanan diyolo do hiti.
Kalapas iri, sinumalakoi e Fr Jalius om Fr Maxmillianno do id sasawat suang dewan dii miampai kinoruhang di sister om pipiro puru do MPP, minomutul tindalam, minogiilang makan om haro nogi pipiro kopokitanan sinding mogiaampot mantad puru katekis, komulakan om tososongulun.
Tinutup ot karamaian dii miampai sambayang koowian mantad di Fr Maxmillianno.
