By Katekis Peter Lidadun
July 18 2020
SAASAU zou, izou, do koongou do boos: “Izoon dotokou o ginavo” ka. Kinongoon, lotion om lotion ku kozo. Tolotian ku nopo, diho, nga miaga ko au oizo o ginavo/kogiiginovoo; toi kivaa dati dii “au oizo o ginavo”. Dadi, nookuo tu “izoon dotokou o ginavo?” ka dii tudizo ku. Sabap nopo, dati, do oboos o pagangatan “mongizo ginavo” nga kivaa kaantakan do “au oizo” o pomusaavan kokomoi, kumaa doid iso tudduvon/pakaazan tavasi om pointunud.
Kovasian/kounalan daa montok songovian ii tudduvon, pakaazan om dimpoton, nga kivaa gumaga ii duuhia. Dadi, adadi nodii ii oitan do “sandaadau” do tosoou. Kopogovit iho doid pisimbaan, pibaasan do papatahang/papalati do “tosoosoou, tosoosonguhun, dii tongogompit: dii magangat do “mongizo ginavo toi pomusaavan” om dii gumaga. Pomusaavan om dii gumaga. Pomusaavan om pibaasan nodii songovian ii “izonon dotokou o ginavo”.
Nokuo tu izoon dotokou o ginavo?
Kopogilaalati po om opiangazan i mai do toombo ii tonudon; om doiho no do mongizo-ginavo do: monuhuk dii topiangazan. Dadi, oizo nodii o ginavo do monuhuk dii om songovian nodii do dumimpot doid dimpoton. Ii topiangazan nopo nga kapanaak kovasian, kounalan doid songovian. Somoonu do kivaa soosonguhun no ii magangat “mongizo ginavo” do momodimpot do kounalan montok di soosonguhun no.
Miaga ko kivaa nogi do kaantakan do: nakapagavi ko no do ginavo om pomumusoou, kaampai no o soosongkuo noopo inahom do toihaan om ginumu do kabaahan nu; om pointantu no do id ginavo nu do: ii tinoguvang nu nopo nga ingkaa no ii; om nopiangazan no diozu miampai dii piipio tuhun miho komozon do angabaa nogi.
Nga sundung do ingkaa, nga kakal po mai do kivaa tuhun au koodop do mogium lahan do monimban dii tinoguvang nu. Au i monguo, avasi nogi; nga kivaa daa do lahan tavasi, touhud, pointunud, tohuud do popoboos dii pomusaavan dau do momo’uvang do kovasian doid dii naangazan nu. Om nung otoimo ii disido do pomusaavan – tu pomouang ii doid dii naangazan nu, nga toimoon nu ii do tavaavasi.
Kivaa nogi tuhun do papaahau do ginavo.
Kivaa nogi mai kaantakan do “au koodop ii tuhun” do momusoou om mogium lahan do papaahau, papahasa, pakahasa dii diau do pomusaavan; om osilap ko nopo do mokinongou dii; om toimoon nu no ii pomusaavan disido, nga iziau no o ‘obuntungan’ dii pomusaavan kahasa. Iti nodii poogi, do ingaton nu nogi ii pomusaavan disido/dosido. Kivaa kaantakan do “kivaa songuhun ii minamalan tavaavasi do kopooposizon om pogiigizon dau” – nga au notuhuk disido/dosido ii tu kivaa songuhun ii minagavi ginavo do papaahau disido/dosido.
Kogiiginovoo do tosoosonguhun nopo nga mozo do mantad nombo isido/zosido: nohodi isido do ingkaa no ii; om ko’uangai no dii nongoongou, nokiikito, noongoi-ongoi nongoundovotan, nipinsingihaan, nounonom, nopiumanan dau do id poo’ompus dii koposizon dau; kivaa dii pungaanan do “daadau/kodoodouvo” no disido/dosido ii ka.
Kogiiginovoo do tosoosonguhun nopo nga mozo do mantad nombo izoho…
Om oboos nopo dotokou iti nga puangaanan tokou mai do “aanangan do mimboos do nunu ii ‘sensitif’ dovokon.” Kokito om koongou tokou nopo nodii poogi do tuhun, ii osuusuvazan tokou do kogiiginovoo, koboobooso, koimaan, taangazan om toongoi-ongoi, pomumusoou om miaga ko au kosudong, au ohumis, au ouhud, au ohuud ii ula, koozuvo dii tuhun, nga kosianai tokou no disido/dosido; om sumambayang tokou no montok disido/dosido.
Ontok kovoovoosiai timpu om kaantakan, kavasa nogi do kinaman dotokou do “momobuung disido; mambahut, popoongou om popokito disido/dosido do ingkuo om okuukuo da ai hobi po do pointunud, aangavasi om kaanangan songovian. Nga kivaa mai tuhun do “sakaakahi au monoimo do tutuduk, susunud toi boos nu. Kada pungaanai isido/zosido do ‘tuhun tosumbung’ tu daadau no dii: au gia oizo o kogiiginovoo do tosoosonguhun. Amen.
