SAVIAVI dati, tokou do mimang do kahantoi, avasi taangazan do id nunu noopo ii toguvangon dotokou, kaampai no kozo o nunu noopo o piboi’an toi piahaan: nunu noopo kavo dii pungaanan do spoot; om ogumu po kozo ii piboi’an, piahaan suvai. Nga au zou, izou, insan nokoongou toi kabasa toi kokito do oinsanan ii minamot manangkus id spoot, do mositi nopo do oinsanan do limbou koiso. Ingkuo ko iziau?
Songkuo po do natanud sogiigisom naangazan o kootulan do minghuda toi monginobos do oonu noopo o spoot, nga au i oinsanan do kolimbou koiso, ii toinsanan poingamung, do id nunu noopo ii spoot. Kivaa i dii oitan do limbou koiso, koduvo, kotohu om ii touvi no kozo, nopo nga ii noubasanan dotokou do momungaan do ‘kunsit’; kivaa nogi momungaan dii do ‘moguzung kambing’ ka, nung id pigusaan manangkus no.
Nga ii kiguno nopo, ka dii tangabaa do momusoou, nga nokopinggisom ko do tumanud do kootulan minghuda spoot; om nakaamung ko id dii piboian, miampai naavi ginavo om vinakas nu, ka. ‘Tu nung aiso tongosunguhun mamung id dii spoot nga aiso nodii dii spoot (abaabazan), ka.
Dadi, kivaa nodii dii boobooson kokomoi do kahantazan tavasi: Ontok momusoou ko do naaha ko no, ingkuo po nga naaha ko no/au nakahantoi; nung momusoou ko do kahantoi ko, nga nakahantoi ko no; nung momusoou ko do au ko katama mamung, nga au ko no katama mamung id dii piboi’an/piahaan. Nung aanangan ko daa do kahantoi, nga momusoou ko do au ko kahantoi, nga au ko no kahantoi, ka.
“Kahantazan nopo nga tumimpuun mantad vinakas ginavo”
Nung momusoou ko do olugi, atagak ko mai, nga nolugi toi natagak ko no. Kahantazan nopo nga tumimpuun mantad vinakas-ginavo do tuhun. Doiho id suang do ginavo om pomusaavan tavakas o kahantazan, ka. Om nung momusoou ko kozo do aiso lompu nu, au mogongoi-ongoi diisai noopo nga poing-aiso no do lompu nu, au ko no kotootopong po diisai noopo. Mositi poogi do momusoou ko do ‘iziau nga poimbiibida nogi; kivaa tomoimo do aaha nu. Mositi potontuon nu do ‘iziau no iziau’ – kivaa tomoimo do kahantazan/tahantoi nu, ka.
Om ogumu po ii suvai: iti nopo nga kokomoi doid vinakas-ginavo om pomumusoou; okonko kokomoi doid kosumbungan iti; au nogi kokomoi doid ‘mimpokiau’ tu mimpokiau nopo nga pogoduan di Minamangun om nogi do undang-undang.
“Piboi’an nopo nga okon ko tomoimo nopo do ahantoi”
Piboi’an, piahaan, pisintoguan nopo nga okon ko tomoimo nopo do ahantoi di tuhun tavakas, tohigkang toi oonu noopo isido. Nga ii kahantoi nopo nga ii tomoimo nopo do momusoou do kahantoi nogi isido. Kivaa dotokou do ‘osuusuvazan’ diti boobooson; kivaa dotokou do au songkuo koiho, au songkuo kalati do nunu kozo o lati om komozon diti boobooson, kokomoi do kahantazan, kangku daa, izou. Ingkuo ko iziau?
Nga mantad diti do: oondom ku nodii ii kinaanakan au ku ohiivan: ontok dii minsosomok do opod om vahu toun umul ku: minamung zou do spoot manangkus do sabatu. Miaga ko opod tuhun-spoot o minamung id dii ponongkusan. Impiipio kohiput dii gana/padang ponongkusan, do doiho zou nopo id limbou kotohu. Angalanggou ii tuhun bontugan ngaavi id spoot; izou no o todongkok no kozo. Kuang hobi do piintangaan nogi ii pigusaan, kadadi zou no do ii oitan do ‘kunsit’/moguzung kambing.
Koimaan nogi tu kivaa piipio dii bontugan spoot do: kuminodou o tonsi bodtung om au nodii nakaanu momupus dii sabatu; kivaa dii nokopuan om tampangi om madoi-tadoi nodii do manangkus. Izou nopo nga panangkus zou nopo, miampai pointatap ginavo om avasi o pomumuobo: noubas gia do tootoinaon id kampung, pobuvatan, kotohunan. Kadadi no do ‘izou ii limbou kotohu’, om koopusai no ii sabatu ponongkusan.
Koiningai ku no o ohou do vookon dii tongotuutuo: Atuk! Limbou kotohu iho tanak todongkok/spook, ka. Ingkuo ko iziau!
