Misa sodop ontok di Spiritu Tobitua kopiondot di pinotimpuunan kobuubuzuo Synod, 17 Okt id Katedral Sacred Heart.
By Linda Edward
Oct 27 2021
KOTA KINABALU – Ii Kobuubuzuo’ Synod (Pitimbungakan tagazo do upisol ngaavi’ di Eklizia), nokotimpuun id Eklizia doiti’, id nombo do “papakaa’ ii doid dii taahom”, papaampai do tuhun ngaavi’ dosido do id monoodo-koponontuan id di Eklizia.
I Archbishop John Wong o pinopotimpuun diho’ Synod montok Archdiosis Kota Kinabalu ontok Misa poimbida’ minsosodop dii Spiritu Tobitua doiho’ id Katedral Sacred Heart, 17 Okt.
Iho’ Kobuubuzuo Synod nopo nga’ monimba dii kapamahaavan di Pope Francis montok di Eklizia doiti’ do papaampai om mokinongou doid tuhun ngaavi’ id grassroots, om do maganu dii do sabaagi ontodonon no kozo do kapanaadaan-pomusaavan di Bishop ngaavi’ id di Eklizia.
Noboos di Archbishop John Wong id diti process, do i Eklizia doiti’ nopo nga’ papaampai do “hobi ginazo kaampazan do tuhun ngaavi’ di Kinoingan do id saviavi’ nazatan hobi-kozo no do tuhun ngaavi’, mooi do mokinongou izioho’, maagi om momusoou do lahan ngaavi’ do mongimvagu do kotumbazaan om mamadadi dii do hobi inuhan-kosuusuangai.”
Noboos nogi’ di archbishop do iho Kobuubuzuo nopo nga’ papaampai do kosukuan do paroki ngaavi’ miampai do tuhun ngaavi’ dosido maza’ do sumimba do nazatan tudizo ngaavi’ ii tumuddu doid (i) koluang ngaavi’ do id pinanau, (ii) maagi do tonggungan montok dimpoton songovian, (iii) kopibaasan id Eklizia om tuhun ngaavi’ om (iv) monuidong sondii’ id ‘synod/synodality’.
Iho’ Kobuubuzuo synod nga’ kapapaampai nogi’ do kosukuan ngaavi’ miampai diho’ sizam Komison om tinimungan ‘religious’, om nogi’ diho’ Tinimungan tuhun ngaavi’ id diho’ Archdiosis.
Kosukuan ngaavi’ otimung nopo nga’ maan pobuzuo’ om toguvangon/gunoon id diho’ ‘Synod’ do Bishop ngaavi’ ii poonjulon id Rome do id Okt 2023, nuhuvan do “Montok Eklizia Synodal: Kopiisaan, Kaampazan om Missio”.
Doid di buuan ngaavi’ ii papapanau diti kobuubuzuo, pinosoto di Archbishop do izioho’ nopo nga’ mokinongou no kozo doid diho’ tuhun ngaavi’ om ahansan do iti-om-iti kobuubuzuo’ o tumihombus mai’ do ontok opongo potuu iho’ kosukuan ngaavi’.
Nunsub disido izioho’ do humabus om mamung diho’ tuhun ngaavi’ id tinimungan, tumikid tuhun om sogiigisom todimpot.
Ontok dii Tadau-Minggu’ kopotimpuunan, minoboos toniibo’ i Archbishop kokomoi diho’ kobuubuzuo Synod om timpu’-zuzuon diho’ kumaa’ doid Synod/Pitimbungakan tagazo do Bishop ngaavi’ id Rome, sinusuut do tudizo om simba ngaavi’ mantad hahansanon ngaavi’ do paroki ngaavi’ ii noopusan miampai Misa’ doid di Spiritu Tobitua.
Potindapou id diho’ kopotimpuunan o saviavi’ faado, Kaunsol do Religious, Komison ngaavi’ om hahansanon ngaavi’ do saviavi’ paroki id Archdiosis Kota Kinabalu.
Kopoihaan kokomoi diho’ Process Synod nopo nga’ piboogizon mai’ dioho’ maza’ do Kopomogunaan WhatsApp.
Ii komiti kopongozuvan diho’ kobubuzuo nokomoi id diho’ Archdiosis, ii kapapaampai di Archbishop John Wong, nopo nga’ 11 hahansanon mantad mogisuvai-suvai tinimungan. (Faado ngaavi’) Fr Paul Lo om Fr Wilfred Atin, (Koonduan) Serena Wong om Vera Chin, (Kokusazan) Anthony Lim om Dominic Lim, (Seminarian) Sem Terans Thadeus om Sem Sylvester Wong, om (Religious) Bro Thomas Paul, SG om Sr Calista Saliun fsic.
