KIVAAVAA no do miaga ko’ opodtu iho’ tudizo : “Isai ko?”, om hobi podii do “Isai ko bo?”, om hobi podii vagu’ nung otootolog/opodtu o koboobooso’. Nung au’ tokou kotutun toi’ au’ tokou koiho do ngaan di tuhun udizoon/uoton dotokou ; om ohizab tokou daa do mokiiho do ngaan disido, mooi do kotutun tokou disido om adadi daa isido do tambahut dotokou, nga’ muot tokou disido do id kalaalahano’ tohuud : “Kada’ kokuukuvaai. Isai gia o ngaan nu?”
Ka dotokou. Ohuud iho’ koboobooso’ ; hobi podii vagu’ vinasi’ nung kouniinizo’ toi’ ohou koinsasamod ii ohou dotokou. Nga’ nung tipopokiiho tokou kozo do toiso-iso’ toi’ tosoosonguhun dotokou nga’ kogompit i doid ditia osusui sumusuut. Osoizuk podii kozo do “Isai ko? Isai isido? Isai zou?” – ingkuo po nga’ kogompit nogi’ doid ditia osuat sumusuut. Kaampai nogi’ diti ii isai tokou kozo dii ontok au’ tokou po nohodi’, komozon do vookon di aino tokou po: anaau o susui kokomoi diti.
Nunu o komi au’ avasi’
Osuat noopo iti susui kokomoi do nunu ii nongokotoodo dotokou do “Isai zou? Isai ko? Isai izioho?”. Nung mantad dii tanak po, do mogiigizon poingamung dii tongoubas do manaak do komi’ au’ avasi’, nga’ ii no o topinsingihaan dotokou ; au’ tokou koodop do momusoou do “nunu o komi’ au’ avasi’” do gunoon dotokou do ponimba dii noongou dotokou, sundung do avasi’ om pointunud i’, ii noongou toi’ nokito dotokou.
Nung minogiigizon tokou do poingamung dii tangaanangan do monongkiodu om monongkiimang, nga’ ingkuo po nga’ adadi tokou do ii tangaanangan do monongkiodu. Nung minogiigizon tokou miampai di tangabagasab/magaagasab, nga’ adadi tokou do tuhun tobongikum.
Nung minogiigizon tokou miampai dii tobongikum, nga’ adadi “nunu noopo ii maan dotokou, nga’ momusoou tokou do ingkuukuo po nga’ kahasa’ ii. Nung minogiigizon tokou miampai dii bontugan ngaavi’ di tumoboi, nga’ adadi tokou do tuhun ngaavi’ kotoboi. Nung minogiigizon tokou miampai do tuhun ngaavi’ tangapaagat do mongunsub doid kovasian, nga’ ohuda’ tokou do mamaamasi id kahansanan.
Nung minogiigizon tokou miampai do tuhun ngaavi’ tongoubas do mangazou nga’ adadi tokou do tuhun tongoubas do “monongku-au-giigina’ toi’ ko’ monongkounsikou. Kopogiigizon tokou nopo miampai dii tangaadang nga’ adadi tokou do bontugan id kotuhidan.
Pihio’ no ii angavasi’ om pointunud
Nung minogiigizon tokou nopo do id koumohigan nga’ ohuda’ tokou do mogiigizon om mamaamasi id kotumbazaan. Nung minogiigizon tokou do poiingamung do tuhun ngaavi’, ii oubas do moboos doid dotokou do avasi’ om pointunud no bo ino, ka, nga’ adadi tokou do tuhun ii aanangan do dotokou sondii. Nung nokopogiigizon tokou miampai do tuhun ngaavi’, ii tomoimo nopo do monoimo om mambahut dotokou, nga’ adadi tokou do ii “tomoimo nopo do toimoon om ko’ium do Koginavaan id diti Pomogunan.”
Om ogumu’ po daa ii suvai, nga’ ii-iho’ no nongosuat ku ii naangazan ku do minamalati’ do nunu ii nabasa’, noongou om nokiikito ku do sohinaid gisom baino. Nga’ songian nopo o tanak toi’ ii tongomuhok po nga’ miho komozon do nosuusukod om kiginavo nodii, nga’ kavasa’ om apatut i’ daa do koiho om kotutun do nunu ii tangavasi’ hobi podii nung ii pungaanan do nogonop o sinikulan.
Kada’ potumbazaai do mogumbak di sondii ii au’ ngaavi’ avasi’ om au’ kosudong do tonudon do tuhun poingimatu. Kada’ dodizo do ii kounsub dotokou do dumadi do tuhun au’ angavasi’, ii au’ angavasi’ do okito, oongou om opiumanan ngaavi’ dotokou. Pihio’ no ii angavasi’ om pointunud. Kotohuadan.
