KIVAA mai, dii doun baino, do kopopoondom dotokou dii di koniab; om oondom nopo dotokou ii di koniab, nga pomusaavan nodii dotokou: ii doun baino om ii di koniab – pihavanon dotokou ii do id pomusaavan. Ii di koniab nopo nga pointantu no do ‘tadau’ om au nodii tagal do booson do ii di ‘tadau’ koniab; uha no do oboos do “ii di koniab”, ka noopo.
“Doiti ko nogi”
Ontok nakatanud zou di ina ku do minongoi ‘tomu/badi’ om nogi id nombo noopo ii ogumu tuhun pointimung, noongou ku i z’ina ku do minoboos doid dii noduumakan dosido do: “Doiti ko nogi?’… om sinimba zosido do “Oo…; doiti ko nogi iziau?”; om sinimba iho do “Oo…”
Sundung do tanak zou po nga kivaavaa no do nosuusuvazan zou do mi’uu’uot do “Doiti ko nogi?” Ontok dii agaagazo zou nodii, nolotian ku do iho “Doiti ko nogi” nopo nga kotobian. Kilati, dati, iho do ‘kikounsikaan’, tu nokopisoomo doiho om sompi kakal poimpasi. Osoosogit!
Ontok koopusai ku o sumikul om nokotimpuun zou nodii do pakalaja id iso pakalajaan, kivaa tinimungan dagai do minogium do oonu daa o ponovohi diho “Doiti ko nogi”; iho tinimungan nga nosuusuvazan nogi do tudizo do “Doiti ko nogi”… (do ontok poingiho do doiti/doiho ii uoton toi biisan).
Humizab do avasi
Nopiangazan nopo dii tinimungan dagai do oonu o boos ponovohi diho “Doiti ko nogi” nga “Kopivosian”; tu kilati iho do humizab do avasi om id kovasian ii biisaan/tobion diho: “Kopivosian”. Om kilati nogi iho do: sokio no do kivaa, dati, do kinavagkangan doid tiso om tiso nga “monongkibabas toi monongkivasi” nodii. Kivaa nogi dii tinimungan minomihi do “Ingkuo ko no?” Au nopihi dii dagai do tinimungan iho: “Ingkuo ko no” tu iho nopo nga dahin dii “How are you”.
Ontok di otuutuo zou nodii om oguugumu ii sinuat nabasa om noongou ku nogi: kokomoi do “kotobian doid tiso om tiso”: vookon nopo dii nga ii “miigit do pahad”, mangagu doid dii tobion – mihusi do mangagu-tuhu, kivaa nogi dii “mitungub”, kivaa dii “mamadsok” om kivaa nogi dii ‘mangakat-pahad/hongon noopo. Om kivaa dii ‘poimbiibida’ – nga miaga ko hizab/balakat ii ho – tu “pibabasan miampai diozu”, ka. Humizab do miampai dii tobion o “pibabasan” – pibabasan nopo nga iso dii pokiikionuon ngaavi dotokou.
Nunu ii diau do pinihi?
Dadi, toombo no ii diau do, kotobian, topihi: miigit pahad? Mitungub, mangagu-tuhu? Moboos noopo, doid dii tobion, do: Kopivosian? Ingkuo ko no? toi kivaa po do suvai ngaavi? Izou nopo nodii, do dau, do baino nga nopihi ku o “Kopivosian” – tu nung kivaa, dati/sokio no, do kivaa “au nu naanangan/au nu koimazaan doid dogo, nga ontok do moboos/tumabi zou diau do “Kopivosian” do “ingkuo po nga mivasi kito nodii” tu id diti pomogunan nopo nga iho no “mogivaavasi, mongitung, moboos om id koimaan, o iso dii hiihizabon dotokou”. Ontok mogivaavasi tokou, ounsikou i Minamangun tu ino no mogivaavasi tokou o iso di pokiikionuon ngaavi Disido.
Om ingkuo iho koubasanan, koubasan haid dotokou di poguhu i do “Doiti ko nogi” ka? Aanu i naku iho do momoguno do ontok kopituka, kopiduumak, izou om iziau, doiho id tindahanon: Doiti ko nogi. Au songkuo oonong, ii noongou ku nopo do ontok kopituka toi kopiduumak do id tindahanon nga: Nombo ngozon nu? Nombo pakaazan nu? Toi mantad ko nombo, oi… It inga au ku nogi noubasanan, izou. Ingkuo ko iziau?
Om noongou ku nogi do doiti, doiho o kotobian do nimaan simbanai, nga montok naamot nopo, dati, tu nunu nopo ii noubasanan om pungaanan do “kointutunan-tinaau” nga kivaavaa no do okonko ouhan do monimban. Nga avasi kozo do nunu noopo ii manaak do koposizon, kapagkaangaan, kobuuon doiti, doiho nga tonudon nopo. Kotohuadan.
