INGKUO po nga kivaa, dati, dotokou o nokoongou do boos do: “Au monguo, kuozon podii!” Avasi i motu o lati diho, koni; nga mozo nogi do nunu ii noboos; om simbao no dotokou do: Au monguo, kuozon podii. Nga ingkuo nung miaga ditia ii simbaon dotokou do: Au monguo, kuozon podii!. “Aiso no kozo do paapantang po diaho do mobooboos kokomoi dogo, nga au no monguo, kuozon podii.”

Om nung angavasi om pointunud ii noimaan ngaavi nu; nga kivaa i do momungaan diau do: “Mongkimaamano toi mongkibaabazai iziaho” ka. Simbaon nu nopo ii do: Au monguo, kuozon podii! Nga kounsikou ko no tu opiumanan nu do angavasi om pointunud ii nimaan ngaavi nu. Om nung aangazan om oduapus nu do tavaavasi ii pongkidaadampatan nu; nga aiso ii noimazaan diau; kivaa i dati do mambahut diau ng mimpuupula noopo do mambahut.

Om kivaa nogi dati do abaazatan om ahadangan i diau; nung ingkaa nga moboos ko nopo do id suang ginavo nu do: Au monguo, kuozon podii. Nga kounsikou no do noduapus om avasi naangazan nu do id nunu ii nimaan nu.

Oohivan do tuhun ii noimaan di tangavasi

Om nung ogumu ii tangavasi om kovasian do noimaan nu, nga osikap i do nohiivan do tuhun ngaavi; nung ingkaa nga kounsikou no do angavasi om kovasian ngaavi ii noimaan nu. Moboos ko nopo do: Au monguo, kuozon podii. Om tihombusan nu nopo do mimang dii tangavasi.

Om nung ouhi om ongotopot ii noimaan nu; nga tadon nogi do kivaa mogohimut diau; nga moboos ko nopo do id suang ginavo nu do: Au monguo, kuozon podii. Om kounsikou no om tihombusai no do mimang dii ongouhi om ongotopot.

Om nung toun o untootobon nu doid minonuidong dii tinuidong/pinavaa nu; om oduuk ii mongungumbak do minomuzas dii, nga soovon nu nopo do: Au monguo, kuozon podii. Om tuidongon om monuidong/papavaa no vagu dii tuutuidongon om pavaahon tangavasi.

Om nung manakadai toi monokodung om monuhung ko diisai noopo, nga ais oi monongkotohuod diau; tadon nogi do kivaa au oimazaan diau, nga moboos ko do: Au monguo, kuozon podii. Om tihombusan no do manakadai, monokodung om monuhung diisai noopo.

Om nung ogumu o tangavasi kozo do pinanaak nu doid diisai ii nonuan nu, nga tadon nogi do au ko posoosongkuozon do tuhun, nga moboos ko nopo doid di ginavo nu do: Au monguo, kuozon podii. Om tihombusan no do manakadai, monokodung om monuhung tu avasi o koimaan do manakadai, monokodung, monuhung dii tongosiisian.

Papanaon nopo o kovosian

Om ogumu po suvai koimaan tangavasi, nga au i monongkotohuod ii tongogompit. Nung ingkaa nga kada koonok, kada kotumpohok; papanaon nopo o kovosian om sontob dii pointunud om tongotopot: pointanud om poingimozo do undang-undang di Minamangun. Tu kivaa dii tangavasi kozo o nimaan, nga noikot noundoso isido do nimaan do tuhun om kokuasaan do doiho do id timpu dii; gisom i ma do pinatai om napatai isido.

Nga mantad dii nimaan ngaavi disido om dii nokoimang ngaavi doid disido, do noumbosian om natampasi o sompomogunan tuhun.

Om totootopot naku do kivaa kaantakan do: au avanangan dii tangavasi, pointunud om pointopot o vookon tuhun. Nung otopot do kivaa do ingkaa, nookuo noma? Sundung ma do ingkaa nga kada no pogundul nung tangavasi, tongotopot om pointunud ngaavi ii diau do kaanangan do mimang; pobuzuon nopo o kovasian, tangavasi, tongotopot om pointunud, tu iti ngaavi no ii pokiikionuon om kaanangan do saviavi ii poingimatu; kaampai no kozo o kotumbazaan om undang-undang om kootulan tangavasi om hobi no kozo di Minamangun.

Om ingkaa no iti pomusaavan do tadau baino. Kotohuadan.