Pibabasan doid diozu oi tobpinai ngaavi’ ku id Kristus. Nokoiho kou do nunu o boos di nongokopoguhu no kozo do noguno doiti’ id Pomogunan? Nokosuat do tuhun tangabaa do boos Tamil, Sanskrit, Greek, Sina’, Hebrew om Arab no o nokopoguhu. Iti boos ngaavi’ nopo nga’ noguno no di nibuvan toun poguhu i’ do nohodi’ di Sangti Maria i Jesus Kristus (Google).
Nokoponuat do kaajalan di Jesus Kristus om ponuu’ ngaavi’ do Kinoingan ii Apostol ngaavi’, id buuk pinungaanan do Bible. Baibol, ka do id boos Kadazan. Baibol nopo do baabaino diti nga’ nakadahin no doid kiikila’ 1551 o boos id pototongkop diti Pomogunan (Google).
Kinodohinan do Baibol
Nakadahin no ii Bible (The New Jerusalam Bible): ii duvo Testamentum, doid boos Kadazan-Tangaa’. Maza’ do balakat om koponontudukan di Spiritu Tobitua kuminaa’ di Katekis Peter Lidadun ; om nosoizuk o kopodohinan diti, do puuvan faado ngaavi’, binuu’an di Msgr. Primus Jouil, do kivaa nodii do Baibol id Kadazan (Tangaa’) om nogi’ id apps ii momoguno do internet om nogi’ id Audio Baibol.
Suvai mantad do Baibol, nakadahin nogi’ di Katekis Peter Lidadun ii Sunday Missal, Weekdays Missal om ogumu’ po ii id buuk missa’ toi’ sambayang do pokionuon ngaavi’, kaampai ii sambayang missa’, joliu, pisasavaan, mambalakat do hamin, hobong, sambayang montok koponongkotohuadan om ogumu’ po.
Nogoogonop Tokou No
Nogoogonop tokou no dii gunoon do sumambayang id boos Kadazan. Monongkotohuod tokou do au’ giigina’ kumaa’ di Katekis Peter Lidadun. Hobi ginazo koponongkotohuadan dotokou kumaa’ di Kinoingan tu’ minomohoou di Katekis Peter Lidadun do papadahin do boos id ogumu’ buuk tobitua id boos haid do English om nogi’ id BM.
Kaanu tokou nodii do mooi tindapou do Missa’ Tobitua do id boos Kadazan id panambazangan toi’ ko’ id nombo noopo kinoizonon timungan tokou do sumambayang. Dazanak ngaavi’ nung oovit mooi sambayang nga’ ahaahaid podii om oubas dii do sumambayang id boos Kadazan.
Isai nopo i kalati’ do boos Tangaa’, po’iao’ no daa kumaa’ di tobpinai, savo, sinavaan toi’ ko’ tanak ngaavi’ do oonu i nolotian id potitikid Missa’ toi’ sambayang notindapou.
Onu Daa Maan?
Avasi’ kozo do tumimung daa o sampaganakan do mogiboboos kokomoi dii kaajalan om pambasaan ii noongoou id panambazangan. Mokinongou no di Audio Baibol do popouhit di boos di Kinoingan ii noongoou id panambazangan, mooi do ogonop nodii ii tolotian kokomoi dii boos di Kinoingan, id boos Kadazan. Okonko’ minooi noopo tindapou di Missa’ om momusoou do, “Sukul po do nokotindapou.
Tu’ au’ zou aanangan do hodongon diisai-isai nung au’ no nokougad sambayang. Poduli’ ma do au’ i’ nakalati’ di Missa’. Kasambut po.”, ka dati’ dii vookon. Atuk! Kada’ no daa do ingkaa tokou. Avasi’ daa do tikid mooi tokou tindapou do Missa’ toi’ onu nopo sambayang id boos Kadazan do kivaa daa dii buuk gunoon sumambayang, id boos Kadazan, do poingovit.
Kavasa’ tokou do minsingiho do boos dotokou. Aiso i’ haid dotokou do kohodi’ nopo o koiho no do moboos id onu noopo boos. Ii boos opiongou-ongou dotokou no o boos pininsingihaan dotokou do papadavot songian do moboos. Mantad id pokiikinangaan pungaanan do tohingo, kumaa’ id tutok om tountud om gisom id diha’ do papadavot dii boos ii maan dotokou booso’.
Pinsingiho no Boos Kadazan
Ogumu’ no tuhun do mininsingiho do boos suvai do au’ i’ nokoiho haid dii boos suvai. Ahaid podii om koboos nodii doid dii boos pininsingihaan dioho’. Ingkaa nogi’ daa iti boos Kadazan. ‘Kinongoon, Pobooson, Posuaton om Soizukon’ do tikid tadau om kahaahaid podii om koiho nodii moboos om monuat id Kadazan. Mositi’ no do oupus tokou diti boos do tinau’ sondii’. Nung au’ nopo tokou tumimpuun do minsingiho boos tinau’ dotokou, atagak mati’ o boos Kadazan do au’ nodii ahaid.
Kanou no minsingiho do boos Kadazan. Nung ondomon tokou kozo, miaga ko’ au’ tokou kosudong do lumamai tikid Tadau Kaamatan nung au’ no tokou koiho do moboos id boos Kadazan sabap Tadau Kaamatan nopo gia nga’ lamazon do tuhun Kadazan mantad di tinuu’ i’. Boos no o pongintutunan do tinau’, ka mai’ dii.
Kanou no kama. Kada’ koikum-ikum do kuminam do moboos Kadazan. Oubat no kozo i buuk tobitua’ ngaavi’ id Kadazan di nakadahin no tavaavasi’. Okonko’ ouhan ii kalaja’ di Katekis Peter Lidadun dii. Nopihi’ isido di Kinoingan do kuminalaja’ montok onu nopo buuk gunoon dotokou do sumambayang id boos Kadazan.
Opiumanan ku do miaga nopo do au’ tokou monongkotohuod di Kinoingan nung au’ no tokou minsingiho do boos tinau’ Kadazan, mooi do ahaahaid podii, aiso nodii kobohingkaangan do mampazat do Missa’ id boos Kadazan. Tinau’ suvai id pototongkop do Pomogunan nopo nga’ noikot inunsikou do songian do kibuuk tobitua’ nodii izioho’ doid boos tinau’ dioho’ sondii’.
I zotokou tu’ tuhun Kadazan? Ingkuo? Au’ ounsikou? Au’ monongkotohuod di Kinoingan? Boos dotokou, boos Kadazan, nopo nga’ tungkus di Kinoingan doid dotokou. Gunoo’ no dotokou iti boos nokomoi, do mangazou, mambantug om sumamba di Kinoingan. Amen.
