PIBABASAN doid saviavi’ ii mambasa’ diti hivang. Kaanu tokou do mambasa’ do sinuatan sabap ki-tutok om ki-mato tokou. Mantad po di kohodi’ tokou do kivaa no haid do tutok dotokou sundung do oniini’ haid.
Ontok guminazo, nogonop tokou do takanon om tinumon do pinapagazo diti tutok poinsuang id tompuung do tuhu. Nokopinsingiho tokou do humoub, humondoi, monungkamang, mingkakat, mamanau om kahaa-haid po om nokoiho tokou nodii do minanangkus.
Tutok no o ginuno do id pininsingihaan do gisom nakapanangkus tokou. Mositi’ tamangan dotokou tavaavasi’ o tutok dotokou. Kada’ do gunoon doid kalaatan. Kada’ nogi’ pogungo’ toi’ poguguo’ o tuhu songian do kivaa kahadangan toi’ pomuagaan tu’ iti tuhu no o pinoizanan do tutok.
Gunoo’ no soumul-umul o tutok
Kogumuan dotokou do nokoiho do minambasa’ om minonuat id sikul pangaan tosiibo’ po haid. Maakavas o sinikulan, nga’ maakavas nogi’ i noihaan dotokou. Gisom songian tokou do minsingiho?
Sisimba: Gisom do soumul-umul sahagi i’ do poimpasi tokou po om avaavakas po o tutok do gunoon do minsingiho do onu noopo i tangavasi’ do ihoon. Iti no o tanda’ do monongkotohuod tokou di Tuhan Kinoingan do noonuan tokou Disido do tutok. Kivaa do vookon do moboos do, “Oonu kanu? Monginobos toihaan?
Nokosiit no do tavan o sinikulan ku om au’ nodii tagal do obohingkaang po do monginobos toihaan. Mundoong zou nodii.” Kada’ undoong oi tobpinai ngaavi’ ku. Gunoon no o tutok dotokou do sahagi do kaanu tokou do minsingiho do onu noopo i tangavasi’ do ihoon. Okonko’ mositi’ gia do i degree di takavas no kozo o onuon toi’ naanu no. Ogumu’ po ii miho dotokou inoboson.
Tamangai no tutok dotokou
Tutok do tuhun nopo nga’ mositi’ do tamangan dotokou miampai do mangadang do takanon om vaig inumon do tikid tadau, minsodu’ mantad di kaanu papazamut do tutok om avasi’ do momuobo do tongus tabaakas mooi do miho gunoon o tutok do mongiho do onu nopo i tapatut do ihoon.
Id diti vinoun baino, ogumu’ o toihaan kavavagu ii angavasi’ nogi’ do ihoon sundung do nokosiit no do tavan o sinikulan dotokou. Poomitanan, program ngaavi’ po, ii momoguno do internet nga’ ogumu’ o kavo do baino. Pogitiitimbungakan, hoohobi podii do id diti timpu’ do Covid-19, nga’ momoguno do Google Meeting, Zoom Meeting om ogumu’ po suvai.
pps montok talipaun piovit-ovit om kompiuto toi’ i-pad dotokou nga’ ogumu’ no. Id kakadazan toi’ id nombo noopo kinoizonon tagaagazo om toguugumu’ tuhun, ogumu’ nogi’ i kakamot ngaavi’ kavavagu ii mositi’ no do koiho tokou do momoguno. Iti nodii do gunoon dotokou o tutok mooi do koiho nodii do kumuama’ do kakamot ngaavi’ kavavagu ii ogumu’ no do id timpu’ baino.
Sumambayang hobi poguhu
Otopot no do nokoinobos tokou no do toihaan id gana’ nopihi’ haid dotokou nga’ mumu’-gumu’ o toihaan kavavagu ii mositi’ ihoon dotokou. Mooi do kakaal i’ dotokou kapakalaja’ toi’ ko’ kaanu monoina’ do onu noopo toinaon dotokou.
Gunoon daa dotokou o tutok, pinataak di Minamangun, do tumihombus mongiho do toihaan kavavagu ngaavi’. Tikid timpu’ do songian do momoguno do tutok do mongiho dii au’ dotokou oihaan, sumambayang po haid. Mokituduk po di Tuhan Jesus Kristus nung avasi’ do ihoon ii ihoon.
Onuan i’ mai’ tokou do lahan do ingkuo do mongiho do toihaan kavavagu, nung avasi’ no ii. Tutok dotokou mositi’ do papanaon tomoimo mooi do au’ kokodou tu’ kotimpuun nodii mai’ do kumukus o kuhit hoohobi no kozo doid labas dotokou do songian noindamaan nodii ginumu’ dii au’ oihaan dotokou.
Nunu tadadi nung tumood monginobos?
Tutok do tuhun nopo nung tumood no monginobos do toihaan nga’ ahaid podii om mimang mai’ mungkang om obinhiiu dii do onu noopo. Kivaa nogi’ tuhun do au’ po songkuo nohoing, nung au’ no minintamong do kohidasan do tutok om tuminood monginobos do toihaan, do ngaan po sondii’ nga’ nohiivan dau’.
Doolu’ podii do kosoou do id nombo zosido do poingizon. Dadi’, gunoo’ no daa dotokou o tutok dotokou do monginobos toihaan, ontok do miho po do gunoon. Kada’ hiivai do sumambayang po haid poguhu i’ do momoguno do tutok ontok monoina’ do kalaja’ dotokou.
Nung au’ tokou nopo gunoon tavaavasi’ o tutok dotokou, nga’ miaga nopo do au’ tokou monongkotohuod di Minamangun do nohodi’ tokou miampai do tuhu ii ki-suang no haid do tutok. Nga’ mositi’ no do ingaton dotokou do kada’ gunoo’ do lumaat o tutok dotokou : montok popoimamang, monozibut do usin dovokon, mongundoso toi’ mamatai do suvai tuhun.
Kanou no monginobos do toihaan miampai momoguno do tutok poinvasi’ nopo sabaagi tanda’ do monongkotohuod tokou di Kinoingan om mooi do kotihombus tokou mamaamasi tavaavasi’ sundung do naamot nopo do id diti vinoun.
