POINTUNUD i, kangku daa, do koiho ditia ngaavi o tanak: Koiho do ngaan dau, poimponu; koiho do ngaan di tina om tama dau, poimponu; koiho do numbul tolipaun (hamin om tolipaun piovit-ovit; om ngaan do kampung dau, poimponu.
Dadi mohoing tina om tama dau o mongimuot/mudizo do tanak dioho; izanan do papatantu do totootopot do koiho diho o tanak dioho.Om poihoon nogi o tanak do: sokio no do kivaa iisai noopo totutunan dioho do: manaak dioho do nunu noopo, kaampai o papasakai do kulita, nga mositi do poihoon po ii tanak o mohoing dau.
Nga nung aiso tolipaun dii tanak; om aiso koonuan dau do mogohos tolipaun toi manakadai popoohos do tolipaun, mooi do kopiboos dii mohoing dau ii tanak, nga sonsoosoou tokou nodii do nunu o lahan potudukon dii mohoing tina/tama dii tanak kumaa doid dii tanak. Nung au otutunan ii tuhun manaak do nunu noopo doid dii tanak, nga kada no toimoo dii tanak ii taak mantad dii tuhun au otutunan.
Nombo noopo o ngozon om nunu noopo o maan dii tanak, nga avasi do koiho ii mohoing dii tanak; om avasi do kivaa kouvang dii tanak do ontok do nombo noopo o ngozon toi nunu noopo o maan dii tanak. Polotion dii mohoing dau ii tanak do: kada pinsoosonguhun ii tanak, do id nombo noopo isido/zosido om nunu noopo o maan toi kuamaon dau.
Poihoon dii mohoing dau ii tanak do: kada kasaga do kamaon diisai noopo o tinan dau/dii tanak; nga ingkuo nodii nung akama ii tinan dii tanak do ontok manakadai disido/dosido o iisai noopo do ontok nokodunsong om au kaanu mingkakat ii tanak? Pomusaavan dotokou iti.
Mogidu mantad dii tuhun di sumonsog do kumama
Nung kivaa sumonsog do kumama dii tanak, nga moboos isido/zosido do “kada” (kada zou kamao). Nung sumonsog kozo ii tuhun kumama nga kavasa ii tanak do gumizak mokisakadai om popoiho dii tuhun id doodoos dau, nung kivaa no tuhun doiho. Om manangkus no mogidu mantad dii kumama dau ii tanak. Sonsoosoou tokou do nookuo tu ingkaa iti. Tudukan do tina/tama dau ii tanak do ingkuo do kaanu sumikap popoiho do mohoing dau, ii tanak, nung kopiuman no isido/zosido do oosizan toi oundoonok diisai noopo om nunu noopo.
Dadi, kumaa doid mohoing ngaavi/tina om tama dii tanak: Sokio no, palis-palis: do tigog natagak ii tanak, nunu nodii o maan dii mohoing di tanak? Sikapon no do popoiho dii sungkad tukad. Doiho dati id kakadazan do natagak ii tanak: nunu nodii o maan dii mohoing?
Sonsoosoou tokou diti. Nung doiho haid i suang hamin toi id datad ii tanak; om tigog po do aino, nunu nodii o maan dii mohoing? Sonsoosoou tokou diti! Iumon dotokou o vaza: nombo ii basaan ngaavi dii tanak? Tuminomod naku do minogidu ii tanak?
Tuutulus sikapon popoiho doid kokuasaan togompit diti katagakan nokomoi. Sikapon popoiho doid manakadai ngaavi. Mositi iumon ii tanak natagak. Kountingau no kozo do mohoing iti katagakan nokomoi.
Sonsoosoou tokou diti pomusaavan
Mimang tokou do au aantakan iti. Nga koongou om kabasa tokou i do “kivaa tanak natagak” ka. Okon no ko mialang-alang o katangaban dii mohoing dii tanak. Nga kivaa kaaka do kaantakan do: minogohimu i do minugad doihuu id tambahut ii tanak, ka. Om kivaa nogi do kaantakan, ka, do: kivaavaa no do minimbolotok haid ii mohoing tu izanan kaakaa daa do monontuduk dii tanak, nga suusuvai no kozo o tanak baino tu “tudukan i om mogidu nodii” ka vagu.
Ogumu no motu ii noongou-ongou kaantakan; om iti no kokomoi doid tanak o iso dii ngaavi. Iti nopo nodii nosuat ku doiti nga ii dogo do nosoosoou do ingkuo nodii do monoguvang do kobohingkaangan diti toi dii miagaaga diti. Kivaa nopo diti do au kosudong nga maai no potunudo om po’uango ii kosudong. Sonsoosoou tokou diti pomusaavan. Kotohuadan.
