KIVAA! Om hobi po ko ino! Om ingkuo o ‘Atus Piatus’? Obuuvong zou, izou, do lati diho ‘atus piatus’, noubas zou do momoguno do ‘atus do atus’ (100%), 50 do 100, 20 do 100. Ingkuo ko iziau? Ogumu diho konunu ngaavi nokiikito, nosoosoou om noongou-ongou ku do miaga ko okon i ko atus do atus (100%), kangku daa, nga tou po. Nga nung otopot do okonko atus do atus iho nga soovon ku nopo itia:

Ogumu no motu ii okonko atus do atus tu navazaan, dati do ponginaman, toluo, sinduo om ogumu po ii suusuvai ii nokoponimban diho. Sundung ma do ingkaa, nga tumihombus zou tomoimo do ‘monongkotohuod’; au zou i moguang, au zou monondos toi papabalat diisai-isai toi do nuununu. Tu ontok do kikokuangan, kikosusaan toi ko kikobohingkaangan, nga modtongus nogi o tongus piumaat/haahaki; toi madaat, modizud, magadau om ahasu kozo. Om i Kinoingan nopo nga tomoimo nopo do kaanu manantu, tumanud noma dii hizab dau. Izou nopo nga lumonggivit nopo doid disido.

Nga okuukuo o koposizon nung aiso koginavaan toi au guminavo dotokou isido? Tumood om tumagak dati ii popounsikou toi ontodonon ngaavi do kounsikaan dotokou. Tumihombus zou nopo nodii poogi do monongkotohuod disido do nunu noopo ii nakataak om taakon dogo disido. Au zou i mongomu toi humodong. Ais oi do nuununu id tana, do kaanu-anu po do umahib/magaha do nindamaan di Kinoingan. Om mangazou zou nopo nodii poogi disido.

Monongkotohuod di Kinoingan

Ii po touvi kozo diti pomogunan om diho konunu ngaavi sinakai diti nga au ku nodii ohizaan do mintong om momusoou; tu iho po doun baabaino kozo ngaavi nga uha no do hizoon ku tavaavasi om poinggonop. Ahasu tadau do maan ku timpuunai do sumambayang, mangazou, sumamba di Kinoingan; monuhuk zou dii ponuu do ‘monongkotohuod’ do gisom i do okito ku isido do mikot-ikot doiho id tavan miampai kahantazan.

Iti pinanau ku id diti pomogunan-siibo nopo nga pinanau do monompogunan kumaa doid disido; vosion ku no o panau ku; kada do kasadu om katabpo; sokio do tigog kasadu om katabpo, nga sikapon no do tumungag om mingkakat om mamanau vagu tavaavasi miampai maazou-paazou di Kinoingan om mamason disido.

Id diti pomogunan nopo nga kivaa timpu ngaavi tavasi om kivaa nogi do timpu ngaavi talaat. Sokio do okon, dati, ko atus do atus, nga mamanau nopo do mintutuk doid dii pogovitan disido dogo, tu doiho id pogovitan disido dogo nopo nga aiso nodii do popoopotongob po.

Om miagaaga no diho o vookon dii tosoosoou ku togumu, hobi no kozo do ontok timpu ngaavi do poimiizo zou soosonguhun. Sundung do okonko “atus do atus” it inga asantaban zou it u giigisom, minagavi ginavo do momuumusoou.

Ogumu o tokito om toongou

Ogumu iho toongou, tokito, tabasa id pinananu, om okonko “atus do atus” kangku daa, nga montok noopo, dati, dogo ino om iho; tu kivaa nogi vookon tuhun do moboos do: iti no, iho no ii “atus do atus” ka; om pantangon ku nogi izioho.

Nga ingkuukuo po nga kivaa dii totootopot do “atus do atus” om okon noopo ko “atus do atus” no, nga poingahib om poinhobi, au miho tukuon do impio ko-100 do 100. Isido nopo ng ai Kinoingan om sontob dii dinadi disido do 100 do 100 om poinhoohobi po vagu.

Om ingkuo no, nunu no ii diau do nokiikito, noongou-onglu om nosoosoou? Iso nopo dii dogo do nokiikito nga: vookon dii tobpinai ngaavi doihuu id suang do panambazangan. Nokito ku do kivaa poinsingkotud sumambayang; om namot dii do nokito ku nogi ii poindikau do ‘mintodos’ dii oitan do ‘tolipaun piovit-ovit’. Monongkisuau isido dii tolipaun dau, ontok do maamaso muubuzu ii sambayang. Oonu kanu iziau do kokomoi diti?