Onu komozon do Sinakagon XYZ?
Isai o sinakagon di nopungaanan do Sinakagon X, Y om Z? Sinakagon XYZ nopo diti nga’ mantad di komohoingan dotokou i nopungaanan do ‘Baby Boomer’ (1946-1964) ka id Google. Aiso po gia ngaan do sinakagon do ‘Baby Boomer’ id Kadazan nga’ id pomolotian ku nopo nga’ izioho’ nopo diti nga’ tuhun sompomogunan di nongohodi’ id suang toun 1946 gisom do toun 1964 om nongokogumu’ o tanak dioho’ saasabap dati’ do nokomomogot nodii koposizon doiti’ id Pomogunan ontok timpu’ nokomoi. Tanak nopo ngaavi’ do ‘Baby Boomer’ diti nga’ Sinakagon X (1965-1976). Tanak do Sinakagon X nopo nga’ Sinakagon Y(1977-1995) di kitanak pungaanan do Sinakagon Z(1996-2010) (Google).
Okuukuo o Sinakagon XYZ?
Nosoizuk no do tuhun tangabaa doid Pomogunan, do mogisuusuvai o ula do misuvai sinakagon. Tumanud di pinonoizukan, Sinakagon X nopo nga’ tuhun ngaavi’ di koiho do minsoosondii’, kaanu monoimo do onu noopo kododizon, au’ otumbazaan do lompu toi’ kabaahan dioho’ sabap agazo kahansanan dioho’ doid pakalajaan.
Sinakagon Y toi’ ko’ ohoou nogi’ do Sinakagon Milenial, nopo nga’ tuhun ngaavi’ di tindama’, kotoimo do onu noopo tantaakan, mogiaha’-aha’, aanangan do intangan toi’ ko’ kinongoon do tuhun. Sinakagon Z nopo nga’ tuhun ngaavi’ di monongkotohuod kokomoi pogisuusuvazan, aanangan do kivaa kovohion doid sosial, aanangan mogibaabagi om momodimpot tuduvan. (Google).
Nung aino i Kristus?
Tudizo? Ingkuo koposizon do sinakagon diho’ nokomoi songian do pobuhaton dotokou. Nung au’ no katanud di lahan koposizon di nokotuduk no di Kristus kuminaa di Apostol ngaavi’ Disido? Notudukan tokou no maza’ do Baibol di Apostol ngaavi’ Disido do nunu om ingkuo o lahan di kotunud no kozo do tonudon do mamaamasi. Id ponuatan ku nopo do baino diti nga’ mogovit songovian do momuondom do ingkuo tokou do popogiot do koginavaan kumaa’ puu paganakan sondii’ mooi do kogiot daa i kagos do piunungan id paganakan dotokou.
Kangku izou, i Sinakagon X nopo daa nga’ angavasi’ tu’ koiho do minsoosondii’ do kumalaja’ di tootoinaon dioho’. Kada’ daa pohongoto’ o kalaatan ginavo songian do pakalaja’ gisom i’ do ongohiivan dii mai’ i tanak ngaavi’ di songingandad do kouhian dioho’. Doodolu’ podii nung i nopo kalaja’ tinoguvang dioho’ dii nga’ kaanu popoimamang di tobpinai dioho’ sondii’. Mositi’ daa do koiho songian om onu mangan di kavasa’ izioho’ do minsoosondii’.
Au’ daa apatut izoho’ do minsoosondii’ do 24 jaam sangadau mooi do i tanak dioho’, i Sinakagon Y, kitimpu’ dii do misompuu miampai mohoing dioho’ doid koginavaan di Kinoingan. Aiso nopo do koginavaan id diti tuhun nga’ id kotuvangan no izioho’. Obimbaazatan izioho’ do ogumu’ tuhun gisom do i po tobpinai dioho’ sondii’ nga’ kabaazatan dioho’. Nongobohou do kotos do Pomogunan om kotos dii nopo kopogovit dioho’ id kotuvangan.
Iti no nolotian ku izou doid suat di 1 John 2:9-11. Do ka, Isai-noopo magampa’ do id tanavau nga’ abaazatan i’ di tobpinai dau’ nga’ kakaal id totuvong. Toombo-noopo-songuhun ii guminavo di tobpinai dau’ nga’ tumindooi id tanavau om aiso i’ id disido do mamadadi disido do humangkab. Nga’ isai-noopo ii abazaatan di tobpinai dau’ nga’ id totuvong om maapanau id totuvong, au’ koiho do nombo ugadon dau’, tu’ i totuvong o nokopomohou disido.
Ii-dii Sinakagon Y ngaavi’ di au’ nongotoina’ di mohoing dioho’, i Sinakagon X, nga’ mositi’ no do poingampai dioho’ i Kristus doid koposizon. Mositi’ kotoimo izioho’ do onu noopo taantakan, sundung potuu do au’ nokoiho i mohoing dioho’, di noindamaan do atangkangau momogusa’ do kotos do Pomogunan.
Gunoo’ no daa nindamaan dioho’ kumaa kovosian. Mogiaha’-aha’ nga’ mositi’ do kotunud. Sundung tu’ do au’ nintangan di mohoing dioho’ do nunu nindamaan dioho’ nga’ ahansan daa do ogiot o ginavo dioho’ do maasambayang doid di Kristus mooi do otudukan lahan koposizon di kotunud.
Kada’ do momuogo dii om tumimpuun nodii do momunso di koginavaan kumaa’ di mohoing om tobpinai ngaavi’ dioho’. Songian do aiso di koginavaan kumaa’ do tobpinai, kilati’ do aino’ i Kristus doid koposizon dioho’. Mogi-o-obpinai nopo daa di katanud do lahan di Kinoingan nga’ i mogitukop-tukop id kovosian, mogibaabagi do kounsikaan, mogituutuduk lahan kobituahan om onu nopo i tangavasi’ doid koposizon.
I Sinakagon Z nopo nga’ tuhun ngaavi’ di tangavasi’ nung minamaamasi no izioho’ doid koginavaan di Kristus nung pinotuzu’ no di mohoing dioho’, i Sinakagon Y om i taki-todu’ dioho’, i Sinakagon X kumaa’ dioho’. Koiho izioho’ do monongkotohuod kokomoi pogisuusuvazan, aanangan do kivaa kovohion doid sosial, aanangan mogibaabagi om momodimpot tuduvan. Nung aiso nopo do koginavaan di doun di Kristus id koposizon do Sinakagon Z, koohon mai’ kumaa’ doid kababaazat doid tiso’ om tiso’ kaampai no o tobpinai dioho’ sondii’ tu’ au’ kotoimo do pisuvazan dioho’ mogi-o-obpinai.
Aiso i’ ngaavi’ do pomusaavan tavasi’ dioho’ montok do sosial, mongumbak kivaa. Mogibaabagi daa, nga’, i kotos om koimaan di tangalaat ii’ o pogiboobogizon om angalaat ngaavi tuduvan dioho’, nung au’ no nokotutun di Kristus.
Iti no nolotian ku izou mantad di suat di 1 John 4:7, kokomoi do nontodonon do koginavaan. Do ka, Oi tambahut ngaavi’ koginavaan ku, kanou no mogigiiginavo, tu’ koginavaan nopo nga’ mantad di Kinoingan om potitikid-tuhun ii guminavo nopo nga’ tanak di Kinoingan om kotutun di Kinoingan. Nung kivaa koginavaan di Kristus id ginavo do saviavi’ tuhun Katolik, kavakas tokou daa ngaavi’ doid piunungan om pogi-o-obpinoizan di togiot om kotunud do lahan koposizon di pinotuduk di Jesus Kristus.
Sinakagon di sumusuut?
Kivaa po vagu’ sinakagon di nokotimpuun no do sumusuut di sinakagon nongokopoguhu. I Sinakagon Alfa di au’ po dii noihaan do ingkuo o ula dioho’(Google). Nga’ lotio’ no tokou do i koginavaan di Kristus no o kaanu do popotihombus do kovosian id ula ngaavi’ do sinakagon di sumusuut diti.
Kada’ no tokou katangkangau kozo do momogusa’ do kotos do Pomogunan, toi’ ko’ momuogo om kansaau no, tu’ otoodo mai’ tokou o sinakagon ngaavi’ di tongosodu’ mantad lahan do koposizon di Kristus. Kotumbazaai tokou no do koginavaan nopo nga’ mantad di Kinoingan. Dadi’, kanou no mogigiiginavo id Ngaan di Tama’, Tanak om di Spiritu Tobitua’. Amen.
