“IMANG kou no gumu…” (Gen 1:28) – Tolotian ku nopo izou diho nga “nosuu toi ko monuu dotokou do gumumu i Kinoingan; om basaon nogi iho Gen2:24; om kivaa nogi diho di St Paul 1 Cor 13:4-8. Abasa po dotokou iho om momuumusoou tokou nodii do taahom-ahom kozo: okonko ‘bogo-i-bogo’; om tigog po o nakasavo no; om au i ahaid om sumusuut no o sonso; om iho nodii o puunon do kaasangan. Ais oi do sonso om puunon do kaasangan nung nokopomuondom haid taahom-ahom do poguhu i do manansavo.
Manansavo nopo nga kilati do “monuhuk diho ponuu di Kinoingan”. Ontok nokopisasavo o tuhun (songuhun kusai om songuhun tondu) adadi izioho do iso tinan; nadadi nopo do iso tinan nga aiso tuhun do kavaavasa po do popiada toi popihangkab. Iho no o sabap do mositi momusoou taahom-ahom do poguhu manansavo.
Koginavaan nopo nga kotoboi…
Au adadi misasavo (o tuhun) nung au no miginavo. Miginavo om koginavaan toi ‘love’ nopo nga kada hangatai do kolungaan, pinodtu, binuudsot do koboobooso, ginauk, kosisingkopu do kogiiginovoo, tinolog; “love is never rude,” ka do id boos Inggilis. Om koginavaan nopo nga au monongku-daa-dau, au monoiso, au osingot om sontob miagaaga diho. “Love is not selfish” ka vagu id boos Inggilis.
Koginavaan totopot om poimponu o koginavaan nopo nga au i momoopi sohiihinaid, do id ginavo, nung sokio no do osinduahan o ginavo; tu koginavaan nopo nga osikap do popohiong do hasa dii nakapapakaus dati do ginavo. Koginavaan nopo nga kotoboi doid di tiso (tumbang-tinan), kilati do obonuhuk do kotompuanan kumaa doid dii tiso om tiso.
Nung nadadi do iso, nga kada sinduahai ii iso tinan…
Koginavaan nopo nga mamantang dii tumbang-tinan. Ii misasavo nopo nga sopihiihiong do komungkangan. Tumbang-tinan ka dii koubasan do vookon; om miaga dii kozo do duvo iho; nga id katapatan nopo do nokopisasavo nodii, nga nadadi do iso tinan iho duvo tuhun. Nung nadadi do iso tinan nopo nga kada sinduahai ii iso tinan.
Pisoosoou nopo do: songkuo o ginazo do kogiiginovoo doid Kinoingan kumaa doid dotokou. Obomohiong Isido do komungkangan dii mokihiong Disido do kahasaan, douso, komungkangan. Om doolu ponogi dotokou, ngau mositi no do osikap do popohiong dii nokoponinduo dotokou. Koimaan tagazo om tavasi kozo, dii tumbang-tinan om papasanang ginavo dii tumbang-tinan dau; kada pomusoou do mokisanang dii tumbang-tinan.
Ii tumbang-tinan nopo nga tuhun no toomod; ahandai, dati, o diha do somoonu; om nung opiumanan do nahandai o diha nga sikapon do do mamason om mokihiong dii nakakaau, dati; om sikapon do popohiong dii nahandai diha. Ivadai no ii koubasan do opodtu toi ko moohodong, motok-botok om obohigot kumaa doid dii tumbang-tinan.
Tumbang tinan – nadadi do iso tinan
Ogumu om anaau po o susui kokomoi diti nokomoi. Nga nung otuhuk no kozo ii kootulan tonudon om imozoon dii misasavo – pointanud dii ponuu di Kinoingan, nga kaanu i mai izioho do kounsikaan, ii pungaanan dotokou do “mitunud kozo do misasavo” ka. Nung mitunud kozo do misasavo, nga kikounsikaan i mai do maso humoing toi oohing po tu: nangagazo, om nogonop o giigisom sinikulan do tanak ngaavi om nokogumu o manang-aki om monong-odu; om nokotuhuk dii ponuu ngaavi di Kinoingan, ponuu doid montok dii misasavo.
Soovo no do ii noubasanan dotokou do momungaan do “tumbang-tinan” nopo nga “tinan” nu sondii tu nadadi kou do ‘iso-tinan’; om au ko i kotibusu do moninduo do tinan nu.
