IZOU no motuu o songuhun dii maamaso humoing; ii ogumu’ nogi’ o tosoosoou: ii nangaantakan, nongoongou, nongokito, nongopiumanan, nangabasa’, nangavazaan, nongoundovotan, nongoimaan ku, izou, id dii timpu’ ngaavi’ nakatahib, nga’ osoou ku, nung au’ ku no nohiivan; om doolu’ podii dii angaantakan id diti timpu’ baabaino. Nunu o ingkuo om okuukuo dati’ ii tangaantakan id timpu’ ngaavi’sumusuut?
Nga’ nookuo tu’ naantakan ii nangaantakan ngaavi’; mositi’ naku do aantakan ii? Mantad nombo ii, mantad diisai, isai songkuasa’ dii? Iti no o vookon dii tudizo ku, do ontok diti maamaso zou humoing. Koiho ko i’ dati’ bo do simba diti tudizo ku.
Izou, tu’ sabaagi songuhun dii sogiiginumu’ tutumanud ngaavi’, di Jesus, ingkuo po nga’ ii no di Jesus o nabasa’, tonudon, imozoon om noihaan ku. Dadi’ nabasa’ ku itia Mt 28: 16-20 do ka “Opod o iso’ tuhun tutumanud di Jesus minugad doiho’ id nuhu, sinuu di Jesus izioho’ do mongoi doiho’.
Ontok kokito dioho’ i Jesus, suminamba Disido izioho’; sundung potuu do kivaa vookon dioho’ do nasavaho. Mininsomok dioho’ i Jesus om minoboos doid dioho’ do ka ‘Nakataak doid Dogo’ o saviavi’ kuasa’ id surga om id diti pomogunan (tana’). Ugad kou no doid saviavi’ tinaau-tuhun id diti pomogunan om dodizon no izioho’ do tutumanud ngaavi’ Ku. Podsuon (pomosukon) izioho’ do id ngaan di Tama’, om di Tanak om di Spiritu Tobitua. Ia’on no izioho’ do saviavi’ dii noponuuan (noko-ia’) Ku’. Ingaton (ihoon/soovon) no do tomoimo Zou i’ do miampai diozu, gisom kohimpupuson do timpu.”
Izou tutumanud di Jesus
Izou, sabaagi songuhun dii tutumanud ngaavi’ di Jesus, do ontok nabasa’ ku iti, mininggisom no do pinopo’ia’ dii kopongia’an ngaavi’ di Jesus; om pisoosoou ku nopo iho’ boos di Jesus do “Miampai zou i’ diozu, gisom kohimpupuson do timpu”. Nung noko’ia’ nodii doid tuutumanud ngaavi’ di Jesus ii kopongia’an om pinonuuan ngaavi’ di Jesus, ingkuo po nga’ angavasi’ o naantakan om kaantakan. Kivaa naku do au’ tuminanud dii kopongia’an di Jesus. Nung kivaa nga’ miho komozon do ‘au avasi’ o kaantakan om aantakan do ontok au’ atanud ii kopongia’an di Jesus.’ Iti no o vookon dii monginggumu’ kozo do tosoosoou ku izou, do maso zou humoing.
Kaampai nodii do osoou ku ii nabasa’ ku, kokomoi dii komohoingan dotokou kumoiso’ nogi’,ii au’ minimozo’ dii ponuu’ di Kinoingan; om dii tasab ngaavi’ huminavan di Kinoingan, om ii susui kokomoi di Noah om paganakan dau’ om ii nimaan ahabo’ do tapui mantad savat o Sodom om Gomora om ii au’ notumbazaan di Mononobus, Jesus Kristus om ogumu’ po kozo o suvai. Avagat naku o douso do mantad ko kobituahan id diti pomogunan?
Nakaabal no naku do id pototongkop diti pomogunan ii kopongia’an ngaavi’ di Jesus, pinonuuan di Jesus do papaabal om popo’ia’? Om nokinongou, notuhuk, natanud om noimozo’ no naku dii nimaan paabalai om ia’o? Kobituahan o pokionuon om ponuuan di Kinoingan.
Kobituahan o pokionuon di Kinoingan
Nung atanud, oimozo’ kozo do potitikid tuhun ii ponuu’ di Kinoingan, ingkuukuo po nga’ aiso i’ talaat do aantakan. Mantad linaat do nitungan, gaab, hizab talaat, boos, kogiiginvoo’, koimaan do tuhun ngaavi’ o ontodonon do douso om koidu’ do kobituahan. Kobituahan o pokionuon di Kinoingan.
Kobituahan o pokionuon di Kinoinan; asil do kobituahan nopo nga’ kaantakan tangavasi’; nung douso o pihi’ do tuhun nga’ tuva’ do douso nopo nga’ kaantakan tangalaat.
Sundung ma do ingkaa, nga’ “tomoimo miampai dotokou i Kinoingan; miampai dotokou i Jesus gisom doid kohimpupuson do timpu”. Kanou no minggisom kozo do monuhuk, mimozo’ om tumanud dii ponuu’ ngaavi’ di Kinoingan; kanou no umivad mantad dii pogoduan ngaavi’ Disido. Om ingkaa nogi’ o pason, tutuduk om ponuu’ ngaavi’ kumaa’ doid sinakagon ngaavi’. Om osoosogit tokou i’ mai’. Amen.
