“VAZA’ do tunok” ka dii duuhia; om “vaza’ do tunak”, ka dii doihuu’ om duutia. Tinanda’ no do ingkaa; toimoon nopo do sompi kotunud, mooi do aiso kumaus; pibaasan om maan i piangazai do osiisivat po. Potumbazaai ku nopo nodii poogi ii duuhia.
Pananong zou po do naamot. Iti tonongon ku nopo nga ‘nipi’. Susuzo’ ku no iti nipi/tinipi, kio?
“Insan sodop, minoginipi isido do : maapanau isido id dii tisan dii daat; miampai disido i Tuhan. Okito disido doiho’ id tavan ii kinokookoozo’ disido do id koposizon dau’. Doiho’ id kotogisan nopo nga’ okito disido o duvo vaza’ do tunak : miaga ko tunak ii do duvo tuhun miipipahud do mamanau.
Koiho no isido do ii tunak ngaavi’ nopo nga’ disido dii tiso’ om di Tuhan dii tiso’. Ontok intahang doid disido ii vaza’ touvi no dii tunak dau, nokito disido o vaza’ dii do doiho’ id kotogisan. Nokito disido do saasau’ do miaga ko’ soosonguhun po o sanganu dii tunak.
Nokito nogi’ disido do saasau’ do naantakan do aiso do vaza’ do tunak dii koluang disido do minamanau doiho’ id kotogisan; om iho’ nopo nga’ naantakan do ontok dii minsosomok nodii doid kohimpupuson o koposizon disido.
… Iso’ po ii tunak ku o tokito ku, aino ko miampai dogo’…
Nopusou kozo isido do nokokito diho tunak nokomoi. Om udizoo’ nodii isido di Tuhan, kokomoi dii toi’ lati’ dii toi’ nookuo ii tu’ ingkaa. “Oi Tuhan, nokoboos Ko do nakatantu’ zou nopo do mositi’ maatanud diau, nga’ mositi’ maatanud ko nogi’ dogo’ do id poo’ompus tindahanon.
Nga’ kokito ku do ontok dii id kobohingkaangan zou kozo do id koposizon, miaga ko’ aino ko i’ do miampai dogo’ tu’ ii-ii po tunak ku o tokito ku. Au’ zou kalati’ do nookuo tu saasau’ naantakan do aino ii tunak nu Iziau; saasau’ ko naku do minogiduan dogo’, oi Tuhan?”, ka disido. Suminimba i Tuhan : “Oi tanak koupusan ku, guminavo zou i’ kozo diau; om au’ ku i’ tiitinongkizadan po iziau.
Nga’ ontok nopo dii id kobohingkaangan toi’ id kosusaan ko kozo, nga’ binuntut, binabo’, sinuunan, kinibit ku iziau. Ontok dii ngaavi’ no do ii-iso’ po o sontunak dii tunak nokito nu do: soosonguhun/ii-iso’ po o sanganu,” ka di Tuhan do suminimba disido.
Lumonggivit tokou nopo di Tuhan…
Oi tobpinai, nipi/tinipi iti, nga’ oonong kozo, kangku daa. Tu’ id nombo tokou noopo om soosongian nopo om id nunu noopo o kaantakan doid dotokou, nga’ tomoimo do doiho’ i Tuhan ; tu’ ka dii noihaan om nabasa’ dotokou id dii buuk pinosuatan do tobitua : I Kinoingan nopo nga’ id nombo-nombo nopo om soosongian noopo… Dadi’ iho’ id nipi/tinipi nopo nga’ kibiton, buntuton, boboon, suunan tokou di Tuhan do ontok id kobohingkaangan tokou.
Ingkuo ii kobohingkaangan do nadadi; mantad komungkangan, kokuangan dotokou; mantad dii mananaak do kobohingkaangan ; mantad poginaman ngaavi? Sundung do ingkaa nga’ tomoimo doiho’ i Tuhan. Lumonggivit tokou nopo disido; kada’ pingkuluod do ontok maso boboon, kibiton, suunan, buntuton di Tuhan, tu’ mogovit i’ dotokou i Tuhan, poposoboong dotokou doid soboong ; om osoosogit tokou i’ mai’ vagu’ do koikot doiho’ id soboong.
Nipi iti nosusui doiti’ ; pamaazan no iho’ boos ‘nipi’. Au’ ko, iziau, insan poginipi? Oonu ka dii nipi nu? Nipi nopo toomod, nga’ nipi no : kivaa nipi tavasi’, kivaa nipi au’ avasi tu’ kopopotigog : ii oitan do ‘mogompuvang’ ; okonko’ ‘mogompuvan’, boos otoodo mantad dii boos ‘nompuvanon’.
Pogoduan o otumbazaan do nipi. Saasau’ zou, izou, do minoginipi, nga’ kogumuan kozo dii nipi ku do ‘noposik’ zou nopo om nohiivan ku no do oonu ka. Kivaavaa no do oluuluo ii mogompuvang, tu’ naaba’ ii mija’ ku toniini’ do naatad ku do ontok minogompuvang zou.
Kohigaganan nogi’ daa. Nga’ aiso i’ do nuununu naantakan do gisom baino tu’ nakabasa’ zou dii kopolotian do nunu kozo o ‘nipi’, okonko’ do nunu ii ‘noipi’. Kivaa noongou ku do : Ongoi zou po pomohi do ‘lutalai’ tu’ nokoipi zou do ingkaa om ingkaa, ka. Nga’ noongou ku i vagu’ do ‘ovudut’ pamazo’ o nipi, ka. Kotohuadan.
