HUMINISAU nogi’ iho’ Tadau di kosuvab miaga di poguhu i’, do minamabang vinoun dotokou.  Notonob nogi’ o Tadau do songian suminovohi’ o totuvong di koniab om di songkoniab.  Nga’ okuudi’ o tuhun do minomusoou kokomoi diti.  Ogumu’ tuhun doid vinoun do baabaino diti do nongokohiu nodii do Minamangun. 

Iso’ sabap nopo nga’ noindamaan do atangkangau do mamaamasi.  I di poguhu i’, kopogitaatanud i’ o sampaganakan do kumaa id panambazangan do mooi sambayang.  Sundung do mintana’ om mononsolipal no potuu do mooi sambayang. Miampai ginavo di otoonong do mooi pokinongou do boos di Tuhan Kinoingan do doid panambazangan.

Mokinongou izioho’ do ohou do Minamangun.  Mogituutunud izioho’ kumaa id tiso’ om tiso’,  kaampai no o tuhun di totukaan dioho’ do songian maapanau id nombo noopo.  Anganavau o pomuandaman dioho’ sundung tu’ do au’ agazo o pinuavangan doid soibau diti vinoun.  Binabang di Tuhan Jesus Kristus  poingampai dioho’ tomoimo. 

Au’ insan do au’ kaakan, toi’ ko’ aiso do basaan ponokop do tinan.  Ongobuang o pomooson dioho’ om tiak dioho’ nopo nga’ tiak di pohombuson dioho’ mantad ginavo dioho’ di tangavasi’.

Id vinoun diti, do baino, muang-kuang nodii binuang do pomusaavan do kogumuan o tuhun.  Mazo-gazo o kobohingkaangan dioho’ om maid-haid nga’ mudi’-kudi’ nogi’ dii o timpu’ dioho’ montok di Tuhan Jesus Kristus.  Naahung do okon nopo ko’ koololoizan, nga’, kobohingkaangan doid vinoun do baino diti. 

Noihaan tokou do ogumu’ tuhun do kivaa ponuunuatan dioho’ do nunu maan toinao’ do tikid tadau.  Id daasom sominggu’, i-insan no do kosuat o ‘MOOI PANAMBAZANGAN’ ka om kivaa nogi’ di koponuat id ponuunuatan do ‘MOOI PANAMBAZANGAN’(nung ki-timpu) ka.  Nga’ kivaa nogi’ di au’ no nokosoosoou po do pinoposuat do nununu kokomoi do mooi tuubung di Tuhan.  Nokuo?  Tu’ noindamaan tinangkangau.  Angaambanan ngaavi’ do mooi pogia’aau do kotos do Pomogunan. 

Kivaa nogi’ di au’ kaanu do mogiduan mantad di kotos di naanu-anu no dioho’.  Kivaa nogi’ di noindamaan nohibabaan do kobohingkaangan do mamaamasi.  Kivaa vagu’ di noindamaan no nounsikou do kinahantazan dioho’ do doiti’ id vinoun om nokohiu nodii di Tuhan Jesus Kristus, i Minamasi dioho’.  Mugad po sambayang do insan sontoun nga’ uhaa’ no, ka di tosoou do vookon.  Toi’ ko’, kivaa nogi’ di kosoou do aiso i’ do douso dioho’ om tagal no do mooi sambayang.

Doodolu’ po dii gia do baino?  Tu’ oundoso i tongomungkang do koundoodosi diti Covid-19.  I poingampai tomoimo i Tuhan Jesus Kristus id koposizon dioho’, noinggazaan o kahansanan om au’ i’ tuminood do uminampazat do missa sundung tu’ do onlain no. I nokopiuman nodii do aino i Tuhan Jesus doid koposizon dioho’, minokiampun om nokoguuguhi’ id lahan Di Minamangun.  Nga’, oguugumu’ o tuhun do momusoou do, “Nombo noopo dii diti.  Apatai om kuozon podii?”

Au’ i’ nokosoosoou do umampazat doid missa do onlain toi’ ko’ suminambayang sundung  do sominit  do id insan tadau potuu.  Kivaa dati’ di naanangan nogi’ do aiso missa id panambazangan tu’ au’ no oukot o tutok do manantu’ do mooi sambayang ko’ au’?   Kivaa nogi’ di nouangan do mimang mungkang o’ tinan saasabap no do ohibabaan do Covid-19 tu’ ogumu’ di kokuangan do naanu. 

“Odooi!!! Nolugi’ tokou!”  “Odooi! Nakahapas zou do kalaja’!”  I au’ nokosoosoou Di Minamangun, huminingkum nodii kozo do minogiad do koposizon dioho’.  Kivaa nogi’ di minooi tudok.  Kivaa di minomupus do pinuobo dioho’ tu’ nokoinsodu’ om nokohiu do Tuhan Kinoingan. 

Isai tounsikou?  I ki-sangau om i tanganauu’ o todung, tohingo om i sangahai-ahai o diha’ do songkookoko’ mongiak.  Ongounsikou o layat ngaavi’ di Lusifer do tinohikudan do vookon tuhun i Tuhan Jesus Kristus.  Nga’ okuudi’ o tuhun do kopiuman diti.  Sabap, momoguno izioho’ do vinakas do tinan dioho’ do mamaamasi. 

Aino i Spiritu Tobitua’ id koposizon dioho’.  Aiso do kalaja’ dioho’ do nakaanu balakat di Tuhan dotokou    sabap au’ insan do minokianu o vookon diti tuhun.  Om uot no Di Minamangun i talaat do monginam dioho’ do insan tadau.  Kivaa di nakakandai do toluo’, nakaanu do kohigaganan, natagakan di kotos do vinoun, om kivaa nogi’ do tuhun do minogiasang-asang do okon nopo ko’ mogianak-anak nga’ mogisaasavo. 

Otopot no do angavakas om ongohigkang haid izioho’.  Nga’ aiso i’ di vinakas om hinigkang dioho’ dii do songian nakaanu ponginaman mantad do logon ngaavi’.  Aatu’ om apatai tomoimo izioho’ nung au’ no kosoou do gumuhi’ id Tuhan Kinoingan.  Nung au’ nopo koguhi’ id lahan di pinotuduk no haid di Tuhan Jesus nga’ kaansau no izioho’ om aiso suvai o kotutukon. 

Nung kivaa nopo kovosian haid dioho’, nga’ id Tapui Pomohiungan no kotutukon di koduuduvo dioho’.  Nung alaat izioho’ do sohiihinaid poimpasi om au’ nokosivat do mokiampun di Tuhan Kinoingan, om Tapui Naraka’ selajul no o uhion do koduuduvo dioho’.

Dadi’, posik tokou no ngaavi’.  Humisau nodii vagu’ iho’ tadau do poposoou daa dotokou do monongkotohuod di Tuhan Kinoingan do muu-puobo po tokou diti.  Posuangon daa tokou do sumamba di Tuhan Kinoingan doid ponuunuatan dotokou montok do onu noopo o maan tokou toinao’ do sangaangadau om tikid tadau.  Tomoimo tokou do mokianu kasagaan om balakat mantad id Savat. 

Poguhu i’ do otonob iho’ Tadau,  kaanu daa tokou momusoou nung poingampai dotokou i Tuhan Kinoingan do minamaamasi do sangaangadau di baino om tikid tadau id numpaasan dotokou.  Tu’ au’ i’ nokosimban o koginavaan di Tuhan Jesus Kristus.

Guminavo dotokou Isido sundung do au’ nodii nountob do huminisau om tuminonob iho’ Tadau do poingivad tokou mantad Disido.  Kanou no mamaamasi tomoimo miampai di Tuhan Kinoingan, mooi do onuan tokou do vinakas, hinigkang om hinidas di poimbida’ om abalakatan no daa o koposizon dotokou do gisom i’ do hoovon tokou   Di Minamangun do gumuhi’ id Disido.