Dii Christina Omok
NAKAANJUL oh Pinamanaan doid Kobituahan diti di ontok 10 Oct 2026 do tuminakad do Nuhu Sinundu miampai do suminambayang o Tinimungan do Legion of Mary kopiondot no diti vuhan do Joliu Tobitu vuhan koopod. Tuminimpuun o pamanaan diho mantad natadon do panambazangan do St Simon Duvanson di jam ko-7 do minsusuvab.
Soginumu do 100 tuhun Legionaries do uminampazat do aktiviti do Terawi Kuria diti ii binuuan di Presiden Terawi Kuria ii Christinus Jetony. Id tindahanon dioho do tuminakad do Nuhu Sinundu diho kivaa do sambayang do tuu kinosusaan di Sangti Maria do pinapanau dioho. Poingampai nogi dioho ii Presiden do Kota Kinabalu Komitsium ii Jenefer Majalap.
Kivaa nogi do Misa Tobitua do nakaanjul id Nuhu Sinundu do ontok diho ii binuaan di Fr Gilbert Marcus tu isido ponogi ii ‘Spiritual Director’ do Komitsium Kota Kinabalu. Nokotimpuun o Misa Tobitua nokomoi di jam 11 doungosuvab.
Nuhu Sinundu nopo nga komozon do ‘osundu’ om nokuo tu nopungaanan do Sinundu. Nuhu Sinundu diti poinsumpak doid Kg Duvanson Putatan nga nuhu nopo diti nga nohiputan do Kampung miaga Kg Tombovo, Kg Kapazan om songian nopo do kivaa do sambayang hohobi no kozo do Sambayang Lahan Salip otimung no o tuhun ngaavi mantad diti tohu kampung do pogitatanud do sumambayang ingkaa no iti do tikid toun.
Nuhu Sinundu nopo iso nuhu di kointutunan /Kaandasan kozo montok do Tuhun do Duvanson di poguhui. Tumanud nopo do susui di nongokotutuo do ontok diho do nokuo tu nopungaanan do Sinundu nga nuhu diti mimang suni iho nuhu do impipio komozon mimang kavas. Mohoingon ngaavi do ontok diho au nogi nokoiho nokuo tu ingkaa iho nga sasabap no dati do kivaa koguzuan tana do ontok diho do nadadi iho do ingkaa. Onu ii kotumbazaan do tuhun do ontok timpu diho kaantakan do miaga diho nopo nga tombiivo ngaavi di tangalaat do songingizon do nuhu nokomoi.
Ontok ponogi diho do naantakan minagadau kozo do ahaid gisom ii ma do nokoing ngaavi o tana, naasakan ngaavi o toobong om iho nokoponusa di kozo dioho tu aiso do vaig. Pogiupapakat nodii o komuhakan do mantad Duvanson ii binuuan di Datuk Marcus Mojigoh do monuidong do Salip id Tampak do Nuhu Sinundu diho. Kivaa do duvo toigi kazu hamin haid di Aki Domong om di Aki Sipayut, sinaan dioho oh toigi diho miampai do gotong royong nga poguhui diho nimaan po dioho ihikai gisom do nahangga o lahan do dumimpot diho Nuhu Sinundu. Sasabap nodo vinakas do ginavo om notuidong di dioho o Salip nokomoi doid Nuhu Sinundu diho. Ontok 31 Mac 1973 om nimaan balakatai di Fr Florian Jude, songuhun Missionary.
Kopiondot do tadau pinambalakatan diho kivaa pipiio komuhakan do nimaan pomosuko do Katolik mantad Duvanson. Ontok Misa suminambayang ii Fr Florian do mokianu do asam om iso kinaantakan do ontok unduk izioho do pouhian minimang asam do noikot sinapou do minamagazad do tana ii noikot nokoing iso kinounsikaan dioho do ontok diho om iho nogi iso kosunduvan do naantakan id nuhu diho.
Nga sasabap nodii do nakahaid iho salip koiso diho nga noomuk nodii minomusoou di vagu oh mogigizon doid Duvanson do minamaganti vagu diho salip miampai do minomoguno do padaau do pinasakazan diho salip miampai pinogitatambaan dioho do minanaan gisom nodo nokoikot id savat di toun 90an.
Kivaa nogi chapel do tinoodo id savat Nuhu Sinundu. Saviavi tuhun id totoning nga sumompuu ngaavi do Duvanson do mooi takad do nuhu diho do mooi sambayang .
Iso kinaantakan di au avasi di ontok 12 July 2026 id nombo do kivaa pipiio tuhun tanak minooi pongumbak om minabpamabak do tiles om patung di Sangti Maria nga do baino noumbasian nodii vagu.
Kanou no mooi takad do Nuhu Sinundu do sumambayang miampai mangazou do ngaan di Tuhan.
