Di Gabriel Singi
“AMU osonong ginawo om pomusarahan ku nung amu oku no mooi sambayang do Tadau Minggu”, ka do boros sisimbar dii odu Dora Dorinsim Kagu (gambar) soira tinurubung id suang do panambayangan ontok tadau minggu dii nakatalib, 20 Okt 2024.
Odu Dora Dorinsim nopo tii nga kiumur do 92 toun. Sundung potuu do molohing no isio om amu no awakas o tinan dau nga tikid minggu isio do mooi ampayat do Misa Tobitua id Chapel Rusod Tobitua Kg Tomis Jaya, Paroki Bundu Tuhan.
Mamanau isio do gakod tumakad do nulu rumikot id panambayangan id timpak do nulu.
”Mositi do mooi oku sambayang lolobi po haro faado tu kotorimo oku do Tinan do Kristus ii opurimanan ku do kapanahak doho do koposion tolidang”. Minoboros isio do noubas no isio do mooi sambayang koongoi sambayang nga amu osonong ginawo om pomusarahan dau.
Kapanahak kopio do poombitanan tosonong o ralan koposion dii odu Dora diti tu sundung potuu do nolohing nga kakal isio do tumoboi rumikot id panambayangan. Boros kaagu disio dii kopongunsub do songowian tulun do minggisom paparalom do kotumbayaan nga “umur nokolohing amu kapagantob doho do mooi turubung do Kinorohingan id panambayangan. Tumogod oku nung amu oku no susundan dii tanak ku toi ii monongodu doho soira orikot o tadau minggu”.
Kaanu daa do popurimon om kapanahak do pongunsuban iti boros dau lolobi po do sukod wagu do baino do mamantang tadau minggu om maganu do kosiwatan mooi ampayat do Misa sundung potuu ogumu o kobolingkangan.
“Sundung potuu do molohing oku no nga mooi kasari oku ’pagakun’ nung korikot o faado do moi papaakun”, ka di odu Dora.
Alansan daa do kapanahak iti do poombitanan kumaa molohing ngawi do poinggirot o kotumbayaan kumaa Tuhan om rumikot mooi tanud diti Misa Tobitua id panambayangan.
