Dii Peter Zeter
KOTA KINABALU – Kopongo dumout id popopotongkop pisuk ngaavi’ do Malaysia kihiniad 18 vuhan, nopongo ii Pamanaan Salip minonimpoon do susui ngaavi’ kotungagan sunduvan, katangaban, om koinvaguvan kogompit doid koposizon Katolik mantad kakadazan tangatangkangau gisom doid kampung ngaavi’ id dodok.
Kisusuzan iti, tuminimpuun iti dii ontok 3 April 2025, id Katedral Sacred Heart Kota Kinabalu, kopiondot do Tadau Komuhakan Katolik Malaysia ii nabazangan momungaan do MCYD, sumasi’ do sizam salip duminout do saviavi’ sizam diosis id Malaysia. Iti nopo nga’ somboogizan mantad visi hobi ginazo montok popogiot do pisompuuvan Eklizia id siibo’ tema “Lamazo’, Kinongoo’, Mamanau sabaagi iso’ Eklizia,” naatagan mantad di 2018 om nadadi do ponoguhu do Pituubungan Pastoral Malaysia 2026 (MPC 2026), ino nopo nga’ kotimungan koiso’ do saviavi’ diosis id Malaysia.
Salip dumout do posoihi uvang
Sundung do sizam iho’ salip do tinantu’ do monombuhui do165 paroki id pototongkop Malaysia nga’panau diho’ nopo nga’ kodimpot do hongkod ngaavi’ kakadazan. Oviton iho’ salip doid panambazangan tongoniini’ id sokid, papatantu’ do kopiuman do ombo sunduvan, kopiuman do guno sunduvan diho’ panau o Katolik ngaavi’ id dodok. Padaamaan diti pamanaan salip nopo nga’ naanu mantad dii koubasan Salip Komuhakan, iso’ koubasan ii ahaid no do abazagan id diosis ngaavi’ id Sabah, id nombo do pootodon iho’ salip doid potitikid paroki do poguhu oopusan id paroki monompuan montok Tadau Komuhakan Sabah.
Sohinaid do koumbazaan salip id iso’ paroki adadi iho salip do koinvaguvan sunduvan, monompuu do toinsanan komuniti maza’ do taangaangazan ngaavi’. Papaanjul o paroki ngaavi’ do abaabazan ngaavi’, mantad do momusoou kozo do sunduvan gisom doid booboson mimpau doid paganakan. Vookon paroki momihi’ do popovihiu dii salip id hongkod paroki, magangat do ongotumbazaan do mikot om mamantang di salip id kalaalahano’ poinhongkod. Vookon paroki suvai, popokito dii poimbiibida’ miampai mogovit dii salip doid kampung ngaavi’ id dodok, kadaandang do koubasan id nombo do saasau o koubasan do poinhongkod id hongkod paroki. Papatantu’ iti do komuniti id dodok kozo, do kopiuman do kotindapaan dii salip.
Toput luputan id suang Catholic Sabah Vol 69 No 18 di ontok tadau 20 Sep 2026.
