ONU o lahan om onu o talun-alun? Isoo’ i naku o lati’ do LAHAN om TALUN-ALUN? Sisimba : Okon. Talun-alun nopo nga’ vazaan tinoodo do tuhun montok umompus do lahan mugad doid kinoizonon di maan ugado’. Lahan nopo nga’ agazo o lati’ : Lahan do kumaa id kasanangan, Lahan do Kadaa’an, Lahan do ___________ (onu nopo i tosoou do ikoton, dodizon, undoiton toi’ ko’ hiihizabon dotokou). Lahan do Koposizon nopo nga’ ingkuo tokou do mamaamasi. Songian do kogompit i Jesus Kristus sabaagi do Lahan Koposizon, kilati’, mamaamasi tokou miampai poingongou do ohou di Tuhan Kinoingan. Tonudon tokou o ponuu’ ngaavi’di Kinoingan, miaga di Tuhan Jesus Kristus.
Sumambayang monimpuun do timpu’
Tikid suvab, songian oposik, mongiak om sumambayang no do monongkotohuod di Tuhan Kinoingan tu’ kakaal po poimpasi om kotungag po do monoina’ di toinaon dotokou. Okon ko’ mulolou po, om momusoou no do nunu atag do tadau dii om mimpulungag no! Otigagan mai’ o zaa’ id tutok om sangangadau nodii do oinggahaan do tuhu. Toodoon i’ tumungag. Guugumiging po haid. Om kotungag po om poguluonon po haid do mumosoou di Tuhan Jesus Kristus.
Mananda’ salip. Sumambayang toniibo’ potuu. Mokianu tutuduk di Kinoingan Tama, maza’ di Jesus Kristus, mooi do kaanu do kovosian id koimaan tangavasi’ do tadau dii.
Onu? Au’ insan pananda’ salip do tikid suvab? Ii-ii no mugad sambayang doid panambazangan do kapananda’ salip?
Au’ kavasa’ do ingkaa. Ubaso’ no mai’ do mananda’ salip om sumambayang no do toniibo’ potuu, do tikid tadau mantad po do oposik gisom i’ do modop vagu’. Au’ kaanu i tangalaat do minsomok. Koinsodu’ dii tokou mai’ do mantad do douso ngaavi’.
Pointamong dotokou o tasab ngaavi’
Iso’ poomitanan, mananda’ salip om sumambayang do tiniibo’ potuu poguhu i’ do papapanau do sasakazon. Somoonu’ do kopiuman mai’ tokou do somok no daa do noontok tokou do kohigaganan id talun-alun, nga’ impio i’ do aiso ingkuukuo dotokou nung nakapananda’ salip no.
Sabap pointamong o tasab dotokou. Osomok tokou nopo di Jesus Kristus, nga’ tomoimo do okuihiban tokou di tahad do tasab ngaavi’ om au’ kokuukuo dotokou o kohigaganan do au’ no noikot timpu’ do pouhian tokou doid Tama.
Apagau toi’ aiso o tuhun di maasambayang doid di Jesus Kristus do angalaat o koimaan. I touhan do humodong, obimbaazatan, obimpipihadan, mokiindadama’ om ogumu’ po koimaan tangalaat di aanu tokou mogivad nung poindoos tokou tomoimo di Jesus Kristus.
Kivaa mai’ tuhun di au’ insan do sumambayang poguhu i’ do dumuom toi’ ko’ makan. Kivaa vagu’ di oikum-oikum do okito do tuhun ginumuan do mananda’ salip.
Poomitanan, id restoran id kakadazan. Kivaa nogi’ di oubas do sumambayang do poguhu i’ do makan om minum, nga’ oikum-ikum do okito do mananda’ salip om ngongozon nopo di poguugua’o’ i tuntuu’ id kangkab dau’. Om aa-au’ i’ poinggonop o panananda’ salip. Au’ nogi’ kavasa’ iti’.
Kinamai no mai’ do miampai ginavo di pointopot do sumambayang. Mokianu balakat di takanon om tinumon miampai mananda’ salip om sumambayang no do toniibo’ potuu. Apagau o takanon om tinumon di nakaanu no balakat id Savat do kapanaak do toluo’ do touvi tadau.
I nopo tuhun di tongohidang o pomusaavan, nga’ kopomuondom do ogumu’ lahan do dumimpot di dimpoton dioho’.
I nopo tuhun di tongotongob o pomusaavan nga’ ongobohingkaang no do mogium do lahan do dumimpot di dimpoton toi’ ko’ atag dioho’. Dadi’, kada’ tokou hiihivai i Jesus Kristus doid koposizon dotokou do tikid tadau.
Tumanud Ponuu’ di Kinoingan
Tuhun nopo di tongohidang o pomusaavan nga’ i mamaamasi do miampai di Jesus Kristus. Ponuu’ do Kinoingan, atanud ngaavi’ dioho’. Sundung tu’ do onu noopo kosusaan nga’ agazo o kotumbazaan dioho’ do kivaa tomoimo lahan do monguhan do kosusaan dii.
Poingampai di tuhun di tongohidang pomusaavan dii, i Jesus Kristus. Ontok do onu noopo o toinaon dioho’, maasambayang izioho’ kumaa id Kinoingan Tama maza’ di Jesus Kristus. Mantad po do oposik do monongkotohuod do Kinoingan do noposik om muu-puobo, gisom no do modop vagu’, do maasambayang mokianu balakat di Tama, Tanak om di Spiritu Tobitua.
Montok tuhun Katolik, ingkaa no daa o mangan di kotunud no kozo. Kada’ pomoguno do tinan dotokou sokii-kio do gumagaa do kadaa’an toi’ koundasaan di saasaau do poumbanganon di tangalaat ngaavi’ doid tuhun di ongotumbazaan daa di Jesus Kristus nga’ apagau toi’ au’ insan do papaamung di Jesus Kristus id koposizon dioho’. Mositi’ no do mamaamasi tokou tomoimo miampai di Jesus Kristus.
Nung aino nopo i Jesus Kristus do poingampai diti tuhun Katolik, nga’ ogumu’ mai’ o kobohingkaangan dotokou doid koposizon.
Dadi’, potunudo’ tokou no daa lahan koposizon do tikid tadau. Kotumbazaai no do i Jesus Kristus no i Lahan do Koposizon.
