Di Gabriel Singi
BUNDU TUHAN – “Tadau Tina Sompomogunan nopo nga tadau kopomoromitan om karayahan do kinalantayan om komogoton dii nagampot toinsanan tondu pototongkop do pomogunan ii au mogintong do nunu bangsa, boros om kotumbayaan diolo. Tonggungan nopo do tondu ngawi nga poinrantai do tonggungan do tulun kusai ngawi”, ka do sisimbar di Philisia Suali (gambar) ii ponirikohon do Koonduan Paroki Bundu Tuhan soira tinurubung isio kokomoi do kapaandakan Tadau Tondu sompomogunan.
Philisia Suali nopo nga ponirikohon do Koonduan (Liga Wanita Katolik), St Pius X, Bundu Tuhan. Nakatanud isio do komiti Liga Wanita Paroki Bundu Tuhan mantad po dii toun 2004.
“Maya do kinaampayatan ku doid Liga Wanita diti do nakaanu oku do popomogot om popoinkawas do toilaan ku do nunu kopio tonggungan ku saabagi molohing tondu id suang koposion ku. Maya do komiti Liga Wanita nakapanahak doho do kointutunan ku do tikid toun do tulan kotolu toi Mac nopo nga tadau Tondu Sompomogunan. Saabagi songulun tondu, ounsikou om oondos o ginawo ku sabab pinoingkawas dii Pope Francis o kapantangan tulun tondu id eklizia. Tondu Katolik nopo nga nokountung tu id eklizia nopo nga poinrantai om poingadang do kusai o kapantangan dau”.
Noboros di Philisia do ii Pope Fransiskus sondiri o minoboros do tondu nopo nga titahak di Tuhan montok do tulun. Noboros nogi di Pope do kaabaahan do tulun tondu nopo nga miagal nogi do kaabahan do tulun kusai. Pomogunan nopo do baino nga okito tokou do pakalajaan nopo do tondu nga kopiadang nogi do nunu pakalajaan do kusai.
Poingkuro o iman Katolik kagayat do toilaan om karaja songulun tondu? Tumanud dii Philisia nopo nga “sabaagi tondu, ounsikou oku do momurimon do eklizia Katolik tokou nopo nga haro sifat do ‘feminin’ Gereja tokou nopo nga haro sikap songulun molohing tondu ii obingginawo, osuau om atatad. Eklizia nopo nga ‘molohing’ kumaa toinsanan tulun ii kapanahak do ongututumbayaan ngawi do kounsikahan om naagat do Tuhan”.
“Maya do kinaampayatan ku om kinotonudon ku doid paganakan do Liga Wanita Bundu Tuhan noh ii nokoposuni doho om nokosokodung doho do popokito do ‘imej’ songulun tondu Katolik miampai nogi do manampasi kopio di boros do Tuhan ii noboros iid suang buuk Kejadian 1:27. ‘Winangun do Tuhan o tulun tumanud do rupa om turos Dau sondiri’.
Maya do boros do Tuhan diti, noilaan toko do kusai om tondu nopo nga miagal o taraf iid dumbangan do Tuhan. Kusai om tondu no ii tinumungkus do janji-janji ngawi do Tuhan. Songowian tondu nga nakaanu do hak jumadi do tanak do Tuhan om iti noh komoyon do tondu nopo nga obuli nogi do momuruan om mangajar.
Tondu nopo nga momogonop do tonggungan ngawi do kusai. Pomogunan nopo do baino nga ogumu nokomogoton om okito tokou do kogumuan do tondu doid popotongkop do pomogunan do ajadi do momuruan om mongigit do tonggungan dii apangkal miagal do lawyer, hakim, doktor, pilot, mekanik mongingia, journalist, om poingampai no o kabinet do pomorintaan. Sundung potuu do haro karaja toi tonggungan do suai nga kaanu o songulun molohing tondu do papamanau om mogintong do tonggungan dau iid suang do paganakan sondiri. Ohuduk om osiriba ginawo tondu montok do koruhang om tangaanak ngawi dau. Maya do pomusarahan ku om nunu ii nopurimanan ku nga ii Tina Maria no ii najadi do ‘role model’ sabaagi songulun molohing tondu do Katolik”.
Id timpu do kapanaandakan do tadau tondu sompomogunan diti, minanahak ii Philisia do pason om pononsunudan dau montok do koonduan ngawi, “Songulun tondu nopo nga kiwaro o tonggungan dii apangkal doid suang paganakan sondiri, komuniti profesional om pogun ii amu milo papanahon do kusai nopo. Kitonggungan oh tondu do mongigit om momuruan do karaja apangkal diti. Tondu nopo nga mositi do abarani do tumomos miampai kokusaian ngawi lolobi po montok tonggungan id paganakan sondiri om ginumuan.
Kanou no oi tondu ngawi doid nombo nopo do tumanud do pelayanan iid panambayangan moi do tondu Katolik tokou nopo nga kaanu manahak do kalansanan om pombitanan dii osonong montok kovosion do vinoun. Kanou no buruano tokou paganakan toko lolobi po popoimagon om popogirot do kotumbayaan di tanak tokou ngawi do amu no daa yolo kaansau om apalid soira tumoguang do kobolingkangan id koposion diti. Kanou no dodio tokou ii Tina Maria sabaagi do role model tokou dii pointopot”.
Alansan daa do nunu ii pinoilang dii Philisa diti do kapanahak do sokodung kumaa koonduan nagwi do mimporogot do papamanau tonggungan okon nopo ko iid suang paganakan sondiri nga id suang do pelayanan id panambayangan.
